સમગ્ર અમદાવાદમાં સોશિયલ ડિસ્ટન્સિંગના લીરેલીરા ઊડી રહ્યા હોવા છતાં સત્તાધીશો આંખ મીંચીને બેઠા છે.
શહેરમાં હજુ આજે પણ કોરોના સંક્રમણના કેસ નોંધાઈ રહ્યા છે. તો રાજ્યના મુખ્યપ્રધાન પણ કોરોના પોઝીટીવ થયા છે. સાથે તેમના PA પણ કોરોનાનો શિકાર બન્યા છે. તો કોરોનાના નવા 60 કેસ નોંધાયા હતા. અમદાવાદમાં કોરોનાના કુલ 57,715 કેસ અને 2248 દર્દીનાં મોત થઈ ચૂક્યાં છે. જેને દર્શાવે છે કે, આ રોગને હળવાશથી લેવાની જરૂર નથી. પરંતુ અમદાવાદીઓના કમનસીબે મ્યુનિ. સત્તાવાળાઓ કોરોનાએ વિદાય લીધી હોવાનું માનીને તેના સંક્રમણને રોકવા માટેના વિવિધ ઉપાયોને બંધ કરવા લીધા છે.
જાહેરમાં માસ્ક વગર ફરનારા લોકો પાસેથી લેવાતી રૂ.1 હજારની પેનલ્ટી વસૂલવા મ્યુનિ. તંત્રની જેટની ટીમ શહેરમાં ક્યાંય નજરે પડતી નથી. ઉપરાંત સમગ્ર અમદાવાદમાં સોશિયલ ડિસ્ટન્સિંગના લીરેલીરા ઊડી રહ્યા હોવા છતાં સત્તાધીશો આંખ મીંચીને બેઠા છે. કોરોનાની SOP પળાવવા અંગે પેનલ્ટી વસૂલાત જેવી શિક્ષાત્મક કાર્યવાહીના મામલે સત્તાવાળાઓએ 'ભૂલ ગયા સબ કુછ, યાદ નહીં અબ કુછ' જેવો નવો રાગ આલાપ્યો છે. જોકે આ નવો રાગ લાખો અમદાવાદીઓને ફરી કોરોનાની ત્રીજી વેવ તરફ ધકેલે તેવો જોખમી છે.
આમ તો કોરોના મહામારીના કપરાકાળમાં તંત્રે સુપર સ્પ્રેડર્સ શોધવાની કવાયતમાં જાતજાતનાં નાટક કર્યાં હતાં. ક્યારેક ચાની કીટલીવાળા, શાકભાજીના ફેરિયાને સુપર સ્પ્રેડર જાહેર કરવા તો ક્યારેક મીઠાઈ-ફરસાણ, જ્વેલર્સ, ડ્રાય ફ્રૂટ અને ફટાકડાના ધંધાર્થીને નવા સુપર સ્પેરડર્સ ગણવા જેવા ઉધામા કરનાર સત્તાવાળાઓએ ગરીબ ધંધાર્થીઓને દંડવા સિવાય હોટલ-રેસ્ટોરાં, મોલ, શો-રૂમ અને ફૂડ કોર્ટને કોરોનાની એસઓપી પળાવવાના મામલે એક પ્રકારે અભયદાન જ આપ્યું હતું.
કોરોના ગાઇડલાઈન પળાવવાની ફરજ બજાવતા મ્યુનિ. સોલિડ વેસ્ટ મેનેજમેન્ટ વિભાગની બેદરકારીના કિસ્સા તો અવારનવાર ચર્ચાતા રહ્યા છે. દિવાળી બાદ કોરોનાની સેકન્ડ વેવ જો શહેરમાં ફેલાઈ હતી તો તે માટે સોલિડ વેસ્ટ મેનેજમેન્ટ વિભાગની નિષ્ક્રિયતા જવાબદાર હતી તેમાં કોઈ તર્ક-વિતર્કને સ્થાન રહેતું નથી. હવે જ્યારે ફરી આ વિભાગ કોરોના ગાઈડલાઇનની અમલવારીના ભંગ મામલે સાવ બેદરકારી દર્શાવી રહ્યો છે તો કોરોનાની હોળી દરમિયાનની સંભવિત થર્ડ વેવના ફેલાવા માટે પણ સોલિડ વેસ્ટ મેનેજમેન્ટ વિભાગ જ જવાબદાર બનવાનો છે.
શહેરમાં માસ્ક ન પહેરવું કે પછી જાહેરસ્થળોએ સોશિયલ ડિસ્ટન્સિંગ ન જાળવવું જેવા કોરોનાના સંક્રમણને સામે ચાલીને આમંત્રણ આપનારાં દૃશ્યો સાવ સામાન્ય બન્યાં છે તેમ છતાં છેલ્લા ૨૫ દિવસથી તંત્રે કોઈ જ દંડાત્મક કાર્યવાહી કરી નથી. અગાઉ સોલિડ વેસ્ટ મેનેજમેન્ટ વિભાગના ઉચ્ચ અધિકારીઓ એક લાખની પેનલ્ટી વસૂલીને પણ તેના ઝોનવાઇઝ આંકડાની અખબારી યાદી પ્રસિદ્ધ કરતા હતા. આ વિભાગના ડેપ્યુટી કમિશનર પણ હરખપદુડા થઈને ટ્વિટર પર પેનલ્ટીની વિગત મૂકતા હતા, પરંતુ હવે આ બધા સ્વચ્છ સર્વેક્ષણ-2021માં પડ્યા છે.