નિવેદન / 'એક રાષ્ટ્ર, એક ભાષા' વિવાદ પર સંસદમાં સરકારે કહ્યું, આવો કોઇ પ્રસ્તાવ નથી, બંધારણમાં તમામ ભાષાઓ એક સમાન

• 'એક રાષ્ટ્ર, એક ભાષા' વિવાદ પર સંસદમાં સરકારનું નિવેદન
• કેન્દ્રીય ગૃહ રાજ્ય મંત્રી જી. કિશન રેડ્ડીએ કહ્યું, દેશનું બંધારણ તમામ ભાષાઓને એક સમાન માને છે 
• કેન્દ્રીય ગૃહ રાજ્ય મંત્રીએ કહ્યું, 'એક દેશ, એક ભાષા' જેવો કોઇ પ્રસ્તાવ નથી

કેન્દ્રીય ગૃહ રાજ્ય મંત્રી જી. કિશન રેડ્ડીએ કહ્યું કે દેશનું બંધારણ તમામ ભાષાઓને એક સમાન માને છે અને 'એક દેશ, એક ભાષા' જેવા કોઇપણ પ્રસ્તાવ પર વિચાર કરાઇ રહ્યો નથી. હિન્દી દિવસના અવસરે ગૃહ મંત્રી અમિત શાહે 'એક દેશ, એક ભાષા' ની વાત કરતા હિન્દી અપનાવવા પર ભાર આપ્યો હતો. તેના પર કર્ણાટક, તમિલનાડુ સહિત દ.ભારતના રાજ્યોએ વિરોધ કર્યો હતો. જોકે, વિવાદ વધતા ગૃહ મંત્રી અમિત શાહે કહ્યું હતું કે મેં હિન્દી થોપવાની વાત નહોતી કરી પરંતુ એમ કહ્યું હતું કે આપણે આપણી માતૃભાષા બાદ હિન્દી પણ શીખવી જોઇએ. 

હવે તેને લઇને સંસદમાં એક સવાલના જવાબમાં જી. કિશન રેડ્ડીએ આ જાણકારી આપી. મંત્રીએ કહ્યું કે દેશની તમામ ભાષાઓને બંધારણ એક સમાન માને છે. ગૃહ રાજ્ય મંત્રીએ કહ્યું, 'ભાષાઓ અંગેનો મુદ્દો બંધારણની અનુસૂચીમાં છે. તેનુ પાલન કેન્દ્ર અને રાજ્ય સરકારો કરે છે. તેમણે કહ્યું કે કેન્દ્રીય માનવ સંસાધન મંત્રાલય તરફથી પણ અલગ-અલગ ભાષાઓને લઇને અનુદાન જાહેર કરવામાં આવતું નથી. 

14 સપ્ટેમ્બરે પોતાના એક નિવેદન પર વિવાદ ઉભો થયા બાદ ગૃહ મંત્રી અમિત શાહે પોતાના બચાવ કરતા કહ્યું હતું કે, મેં ક્યારેય કોઇપણ ક્ષેત્રીય ભાષા પર હિન્દી થોપવાની વાત કરી નહોતી. મેં એક માતૃભાષા શીખ્યા બાદ બીજી ભાષા તરીકે હિન્દી શીખવા કહ્યું હતું.