ગુજરાતના આ ગામમાં લોકો વેક્સિન લેવા આવતા જ નથી, ઢસા આરોગ્ય કેન્દ્ર દ્વારા લોકોને સામેથી ફોન કરીને વેકસીન લેવા બોલાવવામાં આવે છે
બોટાદમાં ડોક્ટરે કરી અપીલ
વેક્સિન માટે અપીલ કરવામાં આવી
લોકોમાં જાગૃતિનો અભાવ
કોરોના વાઈરસે હાહાકાર મચાવ્યો છે ત્યારે કોરોનાથી રક્ષણ મેળવવા માત્ર વેકસીન એકજ વિકલ્પ છે. ત્યારે રાજય સરકાર દ્વારા પણ લોકો રસી લે તે માટે દરેક આરોગ્ય કેન્દ્રમાં રસી આપવામાં આવે છે. પરંતુ બોટાદ જિલ્લાના ગઢડા તાલુકાના ઢસા ગામે કઈક અલગ જોવા મળે છે. અહિ લોકો વેકસીન લેવા આવતા જ નથી. ઢસા આરોગ્ય કેન્દ્ર દ્વારા લોકોને સામેથી ફોન કરીને વેકસીન લેવા બોલાવવામાં આવે છે. પરંતુ લોકો વેકસીન માટે આવતા નથી ત્યારે ઢસા આરોગ્ય કેન્દ્ર ના મેડિકલ ઓફિસરે લોકો વેકસીન લેવા આવે તેવી અપીલ કરી છે.
સમગ્ર રાજ્યમાં કોરોનાએ તેંમનું રોદ્ર સ્વરૂપ બતાવ્યું છે. ત્યારે વાત કરીએ ગુજરાતની તો કોરોનાથી અનેક લોકો સંક્રમિત થયા અને અનેક લોકોના કોરોનાને કારણે મોત થયા છે. ત્યારે સરકાર દ્વારા હાલ વેકસીન બાબતે ઝુંબેશ ચલાવી તમામ લોકો વેકસીન લે તે માટે પ્રયત્નો કરી રહ્યા છે. ત્યારે લોકોમાં પણ જાગૃતા જોવા મળી રહી છે. લોકો વેકસીન લેવા શહેરોમાં લાંબી કતારો લગાવી ઉભા રહે છે. તો અમૂક જગ્યાએ લોકોની એટલી બધી લાઈનો હોય છે કે, વેકસિનનો જથ્થો પુરો થઈ જાય છે. આમ લોકોમાં વેકસિનને લઈને જાગૃતા જોવા મળી છે.
ત્યારે બોટાદ જિલ્લાના ગઢડા તાલુકાના ઢસા ગામમાં અહીં વેક્સિન માટે લોકો આવતા નથી. ઢસા ગામમાં મોટા પ્રમાણમાં લોકો કોરોનાથી સંક્રમિત થયા છે અને અનેક લોકો કોરોનાના કારણે મોતને ભેટયા છે. તેમ છતાં લોકોમાં જાગૃતિ જોવા મળતી નથી. ઢસા આરોગ્ય કેન્દ્ર દ્વારા વેકસીન બાબતે લોકોને ટેલીફોન કરી જાણ કરવા છતાં લોકો વેક્સિન લેવા આવતા નથી. ત્યારે ઢસા આરોગ્ય કેન્દ્રના મેડિકલ ઓફિસરે લોકો વેક્સિન લેવા આવે તેવી અપીલ કરી છે.