ગરમીની સીઝન આવતા જ લોકો હિલસ્ટેશન તરફ જવા લાગે છે. ફરવા માટે અને ગરમીથી થોડી રાહત મેળવવા માટે લોકો બીજા રાજ્યના હિલ સ્ટેશન જવાનો પ્લાન બનાવે છે. બીજા રાજ્યમાં ભાષા, ખાણીપીણીની જાણકારી ન હોવાના કારણે વધુ ખર્ચ પણ થઇ જાય છે. આ ઉપરાંત પણ ઘણી તકલીફોનો સામનો કરવો પડે છે. જો આ હિલ સ્ટેશન તમને તમારા જ રાજ્યમાં મળી જાય તો? ભારતના મોટાભાગના રાજ્યોમાં હિલ સ્ટેશન આવેલા છે.
સાપુતારા, ગુજરાત
ગુજરાતની વાત થાય ત્યારે સાપુતારા સૌ કોઈની પેહલી પસંદ હોય છે. આ હિલ સ્ટેશન અતિ રમણીય છે. આ સ્થળ ગુજરાત રાજ્યના દક્ષિણ ભાગમાં આવેલા ડાંગ જિલ્લાના આહવા તાલુકામાં આવેલું છે. તે સહ્યાદ્રિ પર્વતમાળામાં જંગલ વચ્ચે આશરે 1000 મીટર જેટલી ઉંચાઇ પર આવેલું છે. આ ક્ષેત્ર ડુંગરાળ અને જંગલ વિસ્તાર છે. અહીં ઉનાળા દરમિયાન પણ તાપમાન આશરે 30 ડીગ્રીથી ઓછું રહે છે. જેથી પ્રવાસીઓ અહી વધુ આવે છે.
અરાકુવેલી, આંધ્રપ્રદેશ
આંધ્રપ્રદેશમાં આવેલુ અરાકુવેલી અત્યંત સુંદર હિલ સ્ટેશન છે. આ હિલસ્ટેશન ગલિકોંડા, રક્તકોંડા, સુન્કરિમેત્તા, ચિટમોગોંડી જેવા પહાડોથી ઘેરાયેલો છે. અહીંનુ ફ્રાઇડ ચિકન ખુબ ફેમસ છે. જો તમે અરાકુ જતા હો તો તેનો સ્વાદ લેવાનુ ન ભુલતા.
તવાંગ, અરુણાચલપ્રદેશ
હિમાલયની સુંદર પહાડીઓની વચ્ચે અરુણાચલપ્રદેશમાં આવેલુ તવાંગ પોતાના બૌધ્ધ મઠ માટે દુનિયાભરમાં પ્રસિધ્ધ છે. આ વિશ્વનું સૌથી મોટું બૌધ્ધ મઠ માનવામાં આવે છે. તવાંગની પ્રાકૃતિક સુંદરતાને જોઇને કોઇને પણ આ જગ્યા સાથે પ્રેમ થઇ જશે.
હફલોન્ગ, આસામ
હફલોંગ આસામનું એકમાત્ર હિલસ્ટેશન છે. તે દિલને સ્પર્શી જતા નઝારા અને ધુમ્મસથી ઢાંકેલી પહાડીઓથી ઘેરાયેલુ છે. હફલોંગનો મતલબ થાય છે, સફેદ કીડીઓનો પહાડ. હસીન વાદીઓમાં વસેલુ આ ટુરિસ્ટ ડેસ્ટીનેશન મુખ્ય તો તેના ખુશનુમા મોસમ માટે જાણીતુ છે.
મેનપાટ, છત્તીસગઢ
છત્તીસગઢના સરગુજા જીલ્લામાં વિંધ્ય પર્વતમાળા પર આવેલુ છે મેનપાટ. તેને છત્તીસગઢનું શિમલા કહેવાય છે. અહીં કેટલાય ઝરણા, નદી અને મનોરમ્ય સ્થાન છે. સાથે સાથે તમે અહીં ટાઇગર પોઇન્ટ, ફિશ પોઇન્ટ અને મહેતા પોઇન્ટનો નજારો પણ જોઇ શકશો.
પાવાગઢ, ગુજરાત
વડોદરાથી લગભગ 50 કિલોમીટર દુર આવેલુ પાવાગઢ ગુજરાતનું સૌથી સુંદર હિલસ્ટેશન છે. ધાર્મિક સ્થળ હોવાની સાથે સાથે પ્રાકૃતિક આકર્ષણો અને ઐતિહાસિક મહત્ત્વને લઇને પાવાગઢમાં મોટી સંખ્યામા પર્યટકો આવે છે.
નંદી હિલ્સ, કર્ણાટક
નંદી હિલ્સ કર્ણાટકનું સૌથી ફેમસ અને ઐતિહાસિક હિલસ્ટેશન છે. નંદી હિલ્સ પર એક પ્રાચીન કિલ્લો પણ છે. પ્રાકૃતિક રીતે મનોહર અને અત્યંત શાંત હોવાની સાથે નંદી હિલ્સ, ઉબડ ખાબડ અને ઘુમાવદાર રસ્તાના કારણે બાઇકર્સમાં પણ ખુબ ફેમસ છે. આ ઉપરાંત ટ્રેકિંગનો શોખ ઘરાવનાર લોકો પણ નંદીહીલ્સ પહોંચીને હાઇકિંગ ચેલેન્જ લે છે.
છિતકુલ, હિમાચલપ્રદેશ
હિમાચલપ્રદેની સાંગલા ઘાટીમાં ભારત-ચીન બોર્ડર પાસે બસપા નદીના કિનારે વસેલુ છિતકુલ એક નાનકડુ પહાડી ગામ છે. એ કહેવાની જરુર નથી કે છિતકુલ પર પ્રકૃતિનો અનોખો પ્રેમ વરસે છે. અહીં લોકો લાકડીઓના બનેલા ઘરમાં રહે છે.