લોકશાહીનો અવસર / દુનિયાના ગમે તે ખૂણે રહીએ, પહેલો ધર્મ 'ગુજરાતી': ચૂંટણીના ખાસ મતદારો વિશે જાણો છો કે નહીં 

• દુનિયાના ગમે તે ખૂણે રહીએ, પહેલો ધર્મ 'ગુજરાતી'
• ડીસાના ધારીસણામાં NRI પરિવારે કર્યું મતદાન
• આણંદમાં વિદેશથી માદરે વતન આવેલા NRIઓએ મતદાન કર્યું 
• દિયોદરમાં નવદંપતી અને બાયડમાં વરરાજાએ કર્યું મતદાન 

ગુજરાતમાં વિધાનસભા ચૂંટણીના બીજા અને છેલ્લા તબક્કામાં આજે બપોરે 2 વાગ્યા સુધીમાં 39  ટકા મતદાન નોંધાયું છે. જોકે ગુજરાતના લોકો દેશ-વિદેશ ગમે ત્યાં રહે પણ તેમનો પહેલો ધર્મ "ગુજરાતી" છે. અને તેથી આજે અનેક જગ્યાએ વિદેશમાં રહેતા મતદારો પણ લોકશાહીના આ તહેવારમાં પોતાની ફરજ અદા કરવા માટે આવી પહોંચ્યા છે. 

ડીસાના ધારીસણામાં NRI પરિવારે કર્યું મતદાન

બનાસકાંઠા જિલ્લાના ડીસા તાલુકાના ધારીસણા ગામમાં NRI પરિવારે મતદાન કર્યું છે. વિગતો મુજબ આ પંચાલ પરિવાર છેલ્લા ત્રણ વર્ષથી અમેરિકામાં રહેતો હતો. જ્યારે આજે પંચાલ પરિવારે ધારીસણા પ્રાથમિક શાળામાં મતદાન કર્યું છે. આ સાથે મતદાન કરી તમામ મતદારોને મતદાન કરવા અપીલ કરી છે. 

આણંદ જિલ્લો એટલે NRI ઓનું હબ અહીં ડિસેમ્બર દરમિયાન ખૂબ મોટી સંખ્યામાં NRIઓ માદરે વતન આવતા હોય છે. ત્યારે આવા સમયે ચૂંટણીમાં NRI મતદારોએ પણ ઉસ્તાહ પૂર્વક મતદાન પ્રક્રિયામાં ભાગ લીધો છે. અંદાજીત જિલ્લામાં 7 હજાર ઉપરાંત NRIઓનું આગમન એક મહિના પહેલા જ થઈ ચૂક્યું છે ત્યારે આજે વિદેશથી માદરે વતન આવેલા NRIઓએ મતદાન કરી લોકશાહીના આ પર્વની ઉજવણી કરી હતી. આ સાથે તેમને મતદાન અવશ્ય કરવા અપીલ પણ કરી હતી.

બનાસકાંઠાના દિયોદરમાં નવદંપત્તિએ કર્યું મતદાન

આજે વિધાનસભાની ચૂંટણીના બીજા તબક્કાના મતદાન દરમ્યાન દિયોદરમાં નવદંપત્તિએ મતદાન કર્યું છે. આજે બનાસકાંઠા જિલ્લાના દિયોદર તાલુકાના જાડા ગામે  લગ્નનાં સાત ફેરા ફરી નવદંપત્તિ મતદાન મથકે પહોંચ્યુ હતું. જ્યાં લોકશાહીના આ તહેવારમાં મતદાન કરી પોતાની ફરજ અદા કરી હતી. આ સાથે વરરાજાએ જણાવ્યું હતું કે, મતદાન અમારો અધિકાર મતદાન અવશ્ય કરવું જોઈએ. 

બાયડમાં પણ વરરાજાએ કર્યું મતદાન 

અરવલ્લી જિલ્લાના બાયડમાં પણ વરરાજાએ મતદાન કર્યું છે. બાયડના છાપરિયા ગામે વરરાજાએ મતદાન કર્યું હતું. ચૈતન્ય નામના વરરાજાએ લગ્ન પહેલા લોકશાહી પ્રત્યે ફરજ બજાવી પહેલા મતદાન પછી લગ્નના સૂત્ર સાથે મતદાન માટે અપીલ કરી હતી.