બોટાદમાં ગટર, સફાઇ અને શેરીઑમાં પેવર બ્લોકના આભાવને લઇને હાઉસિંગ સોસાયટીમાં નેતાઑને 'નો એન્ટ્રી'ના પોસ્ટર લાગ્યા છે.
બોટાદની સોસાયટીઓમાં નેતાઓની એન્ટ્રી પર પ્રતિબંધ
હાઉસિંગ સોસાયટીમાં 'નો એન્ટ્રી'ના લાગ્યાં પોસ્ટર
પ્રચાર માટે કોઈ નેતાઓએ સોસાયટીમાં ન આવવાનો પોસ્ટરમાં ઉલ્લેખ
ગુજરાત વિધાનસભાની ચૂંટણીના નગારા વાગી રહ્યા છે. ત્યારે બોટાદની સોસાયટીમાં રાજકીય લોકો માટે નો એન્ટ્રીના બોર્ડ લાગતા રાજકીય ગરમાવો આવ્યો છે. પ્રાથમિક સમસ્યાને લઇને ચૂંટણી પૂર્વે લોકો લડી લેવાના મૂડમાં છે. ગટર, સફાઇ અને બ્લોક નાખવાની કામગીરી વર્ષોથી લટકતી હોવાથી લોકોનો આક્રોશ આસમાને છે.
ગટર, સફાઇ અને બ્લોક નાખવાની કામગીરી ન થતા લોકોમાં રોષ
જાણવા મળતી વિગત અનુસાર બોટાદ શહેરમાં ચૂંટણી પૂર્વે અધ્ધરતાલ રહેલા પારાવાર પ્રશ્નોના નિરાકરણ સ્થાનિકોએ તંત્ર સામે બાયો ચડાવી છે. આ વિસ્તારમાં ગટર, સફાઈ અને બ્લોક નાખવાની કામગીરી લાંબા સમયથી અટકી પડી છે. અનેક વખત રજૂઆત કરવા છતા પણ જવાબાદાર અધિકારીઑના પેટનું પાણી હલતું નથી. આથી લોકો ન્યાયની માંગ સાથે રોષે ભરાયા છે.
સોસાયટી બહાર 'નો એન્ટ્રી'ના પોસ્ટર
બોટાદ શહેરમાં પાળીયાદ રોડ સ્થિત હાઉસિંગ બોર્ડ સોસાયટીમાં રહેતા કર્મચારીઓ અને વેપારીઓમાં તંત્રની કામગીરી સામે અસંતોષ જોવા મળી રહ્યો છે. આથી ગુજરાત વિધાનસભાની ચૂંટણી પૂર્વે આ વિસ્તારના લોકોએ પ્રશ્નોનું નિરાકરણ ના થાય તો કોઈપણ રાજકીય પક્ષોના આગેવાનો ચૂંટણી પ્રચારના નામે આ સોસાયટીઑમાં પ્રવેસ કરવો નહિ. તેવી ચોખ્ખી મનાઈ ફરમાવી દીધી છે. સોસાયટીમાં રાજકારણીઓ માટે "નો એન્ટ્રી" ના બેનરો લગાવી દેતા આ મુદ્દો ટોક ઓફ ધ ટાઉન બન્યો છે. બીજી તરફ લોકોના આ વિરોધે જવાબદારોની પોલ પણ ખોલી નાખી છે.