મહેસાણાઃ તમે ફી નહીં ભરનાર વિદ્યાર્થીને શાળામાં પરેશાન કરવાના અને શાળામાંથી કાઢી મુકવાના અનેક કિસ્સા સાંભળ્યા હશે. પરંતુ આજે અમે આપને એક એવી શાળા વિશે જણાવી રહ્યા છીએ કે જ્યાં ફી ભરવા માટે કોઈ સમય મર્યાદા નથી. આ શાળામાં જ્યારે પણ વાલી પાસે પૈસા આવે ત્યારે ફી ભરવાની છૂટ આપવામાં આવી છે. આ કારણે આ શાળામાં અનેક વિદ્યાર્થી તો એવા છે કે શાળામાં અભ્યાસ પતિ ગયા બાદ પણ પોતાની ફી નથી ચૂકવી. આમ છતાં આ શાળામાં ક્યારેય ફી માટે કોઈ વિદ્યાર્થી ઉપર દબાણ નથી કરવામાં આવતું.
કઈ છે આ શાળા જાણો આ અહેવાલમાં..
એક તરફ ખાનગી શાળાઓ દ્વારા લેવાતી અધધ ફીનો મામલો સુપ્રીમ કોર્ટ સુધી પહોંચ્યો છે. તો બીજી તરફ એક એવી પણ શાળા છે જ્યાં ફીનો કોઇ જ વિવાદ નથી. વાલીઓ ગમે ત્યારે ફી ભરી શકે છે. એટલે ફી મામલે વિદ્યાર્થીઓ એકદમ નિશશ્ચત થઇને ભણે છે.
ફી ભર્યા વગર આપી દેવામાં આવે છે પ્રવેશ
રાજ્યમાં ખાનગી શાળાઓ બેફામ ફી વસુલી રહી છે. ત્યારે સસ્તા ભણતરીની કલ્પના કરવી થોડી મુશ્કેલ છે. પરંતુ મહેસાણાના કુકરવાડા ખાતે ચાલતી એક એવી પણ શાળા છે જ્યાં ફી ભરવા મામલે વાલીઓ એકદમ નિશશ્ચત રહે છે. કારણ કે આ શાળામાં ફી તો છે પરંતુ તેને ભરવા માટે સમયના કોઇ જ સિમાડા નથી. એટલે વાલીઓ ગમે ત્યારે ફી ભરી શકે છે. શાળામાં કોઇપણ વિદ્યાર્થી પ્રવેશ માટે આવે તો ફી ભર્યા વગર પ્રવેશ આપી દેવામાં આવે છે. આટલું જ નહીં ફીનો દર વિદ્યાર્થીઓને મળતી શિષ્યવૃત્તિથી પણ ઓછો રાખવામાં રાખવામાં આવ્યો છે.
કેટલાક વિદ્યાર્થીઓ છે જે આખા વર્ષ દરમિયાન ફી નથી ભરી શકતા
ધોરણ 9થી 12 સુધીના વર્ગોની આ શાળામાં ઓછી ફી હોવા છતાં પરિણામ સારુ આવે છે. અને આટલું જ નહી જે વિદ્યાર્થી સારો ક્રમ મેળવે તેની ફી પણ પરત કરી દેવાય છે. તો એવા પણ કેટલાક વિદ્યાર્થીઓ છે જે આખા વર્ષ દરમિયાન ફી ભરી શકતા નથી. છતાં શાળા દ્વારા કોઇ જ પગલા લેવામાં નથી આવતા.
મહેસાણાના કુકરવાડાની આ શાળાનું કાર્ય વખાણને પાત્ર
ગુજરાતમાં ખાનગી શાળાઓ દ્વારા બેફામ ફીના ઘણા કિસ્સા નોંધાયા છે. જૂનીયર કેજીથી માંડીની ધોરણ 12 સુધી લાખો રૂપિયા ઉઘરાવતી ફી મામલે વાલીઓ મેદાને પડ્યા. અને આખો મામલે રાજ્ય સરકાર તેમજ સુપ્રીમ કોર્ટ સુધી પહોંચ્યો પણ વિવાદનો ઉકેલ આવ્યો નથી. ત્યારે માત્ર શિક્ષણ ધર્મ બજાવતી મહેસાણાના કુકરવાડાની આ શાળાનું કાર્ય વખાણને પાત્ર છે.