રમજાન મહિનામાં સવારે સાત વાગ્યાના બદલે વહેલી સવારે સાડા ચાર કે પાંચ વાગે મતદાન શરૂ કરવા માટે અરજી થઈ હતી. આ અરજીને ચૂંટણી પંચે રદ કરી છે. ચૂંટણી પંચે વિચાર વિમર્શ કરીને પત્ર લખીને આ સૂચના આપી છે.
છઠ્ઠા અને સાતમા તબક્કાનું મતદાન હજુ બાકી છે. રમજાન મહિનો સાતમી મેના રોજ શરૂ થવા જઈ રહ્યો છે અને આ દરમિયાન જ છઠ્ઠા અને સાતમા તબક્કાનું મતદાન છે. સુપ્રીમ કોર્ટમાં વકીલ નિઝામુદ્દીન પાશાએ અરજી દાખલ કરી હતી. અપીલ કરી હતી કે રમજાન મહિના દરમિયાન સવારે સાત વાગ્યાના બદલે પાંચ વાગે મતદાન શરૂ કરવામાં આવે.
સુપ્રીમ કોર્ટે આ મામલાને ચૂંટણી પંચ સમક્ષ રજૂ કરવા માટે કહ્યું હતુ અને ચૂંટણી પંચને કહ્યું હતુ કે આ મામલે જલ્દી નિર્ણય લેવામાં આવે. ચૂંટણી પંચે કર્મચારીઓ પર કામનું ભારણ વધશે એવું પણ કહ્યું હતુ. પણ હવે ચૂંટણી દરમિયાન મતદાનના સમયમાં ફેરફાર નહીં થાય.
ઉલ્લેખનીય છે કે, આજે લોકસભા ચૂંટણીનું 5માં તબક્કાનું મતદાન થઇ રહ્યું છે. જેમાં કુલ 7 રાજ્યોની 51 બેઠકો પર મતદાન યોજાઇ રહ્યું છે. રાજ્યવાર બેઠકની વાત કરવામાં આવે તો બિહારની 5, જમ્મૂ કાશ્મીરની 2, ઝારખંડની 4, મધ્યપ્રદેશની 7, ઉત્તરપ્રદેશની 14, પશ્વિમ બંગાળની 7 અને રાજસ્થાનની 12 બેઠકો પર મતદાન શરૂ થયું છે.