રાજનીતિ / બિહારનાં રાજકારણમાં નવાજૂનીનાં એંધાણ, ભાજપ સાથે છેડો ફાડવાની તૈયારીમાં નીતિશ કુમાર

• બિહારનું રાજકારણ ગરમાયું, ફરી એકવાર JDU-BJP ગઠબંધન તૂટી શકે         
• એક-બે દિવસમાં JDU ભાજપથી અલગ થવાની જાહેરાત કરી શકે: સૂત્ર 
• સીએમ નીતિશ કુમારે કોંગ્રેસ નેતૃત્વનો સંપર્ક કર્યો: કોંગ્રેસના સૂત્રો

બિહારમાં ફરી એકવાર JDU-BJP ગઠબંધન તૂટી શકે તેવા સમાચાર સામે આવ્યા છે. સૂત્રોનું માનીએ તો એક-બે દિવસમાં JDU ભાજપથી અલગ થવાની જાહેરાત કરી શકે છે. સૂત્રોના જણાવ્યા અનુસાર નીતીશ કુમાર આરજેડી, ડાબેરી મોરચો અને કોંગ્રેસ સાથે મળીને વૈકલ્પિક સરકાર બનાવવાની તૈયારી કરી રહ્યા છે. જેડીયુ ભાજપ પર તેની પાર્ટી તોડવાનો આરોપ લગાવી રહી છે. તાજેતરમાં પાર્ટીમાંથી રાજીનામું આપનાર  RCP સિંહ  દ્વારા પાર્ટી તોડવાની કોશિશનો આરોપ લગાવવામાં આવ્યો છે. એટલું જ નહીં, નીતિશ કુમારની પાર્ટીના મોટાભાગના ધારાસભ્યો મધ્યસત્ર ચૂંટણી ઇચ્છતા નથી. આવી સ્થિતિમાં નીતિશ કુમાર આરજેડી, ડાબેરી મોરચો અને કોંગ્રેસ સાથે મળીને સરકાર બનાવવા માટે વિકલ્પો શોધી રહ્યા છે.

બિહારનાં રાજકારણમાં નવાજૂનીનાં એંધાણ

બિહારમાં રાજકીય ગતિવિધિઓને જોતા આવતીકાલે પટનામાં આરજેડી ધારાસભ્યોની બેઠક યોજાવાની છે. JDU-BJP ગઠબંધનને લઈને ચાલી રહેલી અટકળો વચ્ચે આ બેઠકને ઘણી મહત્વપૂર્ણ માનવામાં આવી રહી છે. આ બેઠકમાં ભાગ લેવા માટે આરજેડીના તમામ સાંસદો પણ આજે સાંજ સુધીમાં પટના પહોંચી જશે. 

નીતીશ કુમાર કોંગ્રેસ નેતૃત્વના સંપર્કમાં ? 

કોંગ્રેસના સૂત્રોના જણાવ્યા અનુસાર સીએમ નીતિશ કુમારે કોંગ્રેસ નેતૃત્વનો સંપર્ક કર્યો છે. જોકે, સૂત્રોએ એ વાતનો ઇનકાર કર્યો હતો કે, નીતિશ કુમારે કોંગ્રેસ અધ્યક્ષ સોનિયા ગાંધી સાથે સીધી વાત કરી હતી. આરસીપી સિંહે રાજીનામું આપ્યું છે ત્યારથી તેઓ વિરોધ પક્ષમાં સક્રિય થઈ ગયા છે. બિહાર કોંગ્રેસના પ્રભારી ભક્ત ચરણ દાસે કહ્યું કે, તેઓ સ્વતંત્રતા દિવસ સંબંધિત કોંગ્રેસ પાર્ટીના સત્તાવાર કાર્યક્રમોમાં ભાગ લેવા માટે સત્તાવાર રીતે તાના જઈ રહ્યા છે, પરંતુ સૂત્રોનું કહેવું છે કે, તેઓ રાજ્યમાં ઝડપથી બદલાતી પરિસ્થિતિ પર પણ નજર રાખશે.

નીતિશ કુમાર અને ભાજપ વચ્ચે ટકરાવની સ્થિતિ

છેલ્લા કેટલાક દિવસોમાં જે રીતે મુખ્યમંત્રી નીતિશ કુમાર અને ભાજપ વચ્ચે ટકરાવની સ્થિતિ સર્જાઈ છે તે પછી સતત સવાલો ઉભા થઈ રહ્યા છે કે, બિહારમાં એનડીએની સરકાર પડી જશે અને નીતિશ ફરીથી આરજેડી સાથે મળીને સરકાર બનાવશે. વાસ્તવમાં, જો આપણે છેલ્લા 1 મહિના પર નજર કરીએ તો લાગે છે કે, નીતિશ અને ભાજપ વચ્ચે બધું બરાબર નથી ચાલી રહ્યું. એક મહિનામાં 4 વખત આવું બન્યું છે, જ્યારે નીતિશ કુમારે ભાજપમાંથી પોતાને દૂર રાખ્યા હોય. 

નીતિશે એક મહિનામાં ભાજપથી અંતર રાખ્યું

• સૌથી પહેલા 17 જુલાઈએ કેન્દ્રીય ગૃહમંત્રી અમિત શાહની અધ્યક્ષતામાં દેશના તમામ મુખ્યમંત્રીઓની બેઠક બોલાવવામાં આવી હતી, પરંતુ નીતીશ કુમાર આ બેઠકમાં હાજર રહ્યા ન હતા.
• 22 જુલાઈએ તત્કાલિન રાષ્ટ્રપતિ રામનાથ કોવિંદના વિદાય ભોજન સમારંભમાં નીતીશ કુમારને પણ આમંત્રણ આપવામાં આવ્યું હતું, પરંતુ તેઓ તે કાર્યક્રમમાં આવ્યા ન હતા.
• નીતિશ કુમારને 25 જુલાઈના રોજ નવા ચૂંટાયેલા રાષ્ટ્રપતિ દ્રૌપદી મુર્મુના શપથ ગ્રહણ સમારોહમાં પણ આમંત્રણ આપવામાં આવ્યું હતું, પરંતુ તેઓ ગયા ન હતા.
• 7 ઓગસ્ટે નીતિશ કુમારને વડાપ્રધાનની અધ્યક્ષતામાં નીતિ આયોગની બેઠકમાં હાજરી આપવા માટે બોલાવવામાં આવ્યા હતા પરંતુ તેઓ આ બેઠકમાં હાજર રહ્યા ન હતા.

સૂત્રોએ જણાવ્યું હતું કે, પૂર્વ કેન્દ્રીય મંત્રી અને જનતા દળ યુનાઈટેડના પૂર્વ રાષ્ટ્રીય અધ્યક્ષ આરસીપી સિંહને જે રીતે અપાર સંપત્તિ મળી. કમાણીના મુદ્દાને લઈને પાર્ટી પાસેથી ખુલાસો માંગવામાં આવ્યો હતો, ત્યારબાદ RCPએ પાર્ટીના પ્રાથમિક સભ્યપદમાંથી પણ રાજીનામું આપી દીધું હતું.  બિહારમાં એ વાત ચર્ચાઇ રહી છે કે, આરસીપી સિંહના ભાજપના નેતાઓ સાથે ખૂબ સારા સંબંધો છે અને કહેવાય છે કે, તેઓ જનતા દળ યુનાઈટેડના ભાજપના માણસ તરીકે કામ કરે છે. કદાચ આ જ કારણ છે કે, ગયા વર્ષે જ્યારે નરેન્દ્ર મોદી કેબિનેટનું વિસ્તરણ કરવામાં આવ્યું ત્યારે આરસીપી સિંહ નીતીશ કુમારની સંમતિ વિના કેન્દ્રમાં મંત્રી બન્યા હતા.

ઉલ્લેખનીય છે કે, સ્થાનિક ચર્ચાઓ મુજબ જ્યારે, નીતિશ કુમારે આરસીપી સિંહને ત્રીજી વખત રાજ્યસભામાં ન મોકલ્યા અને તેમણે કેન્દ્રીય કેબિનેટમાંથી રાજીનામું આપવું પડ્યું, તે પછી નીતિશ અને આરસીપી સિંહ વચ્ચે અંતર વધી ગયું છે. આ  રમ્યાન નીતિશ ભાજપની 'ગેમ' સમજી ગયા કે, તેઓ RCP સિંહનો ઉપયોગ તેમને નબળા કરવા માટે કરી રહ્યા છે અને તેથી જ સમય જતાં નીતિશે RCP સિંહ પર ભ્રષ્ટાચારનો આરોપ લગાવ્યો અને પરિણામે RCP સિંહે પાર્ટીમાંથી રાજીનામું આપી દીધું.