12 જૂનનાં નીતિશ કુમાર વિપક્ષી એકતા દળ પટના ખાતે બેઠક યોજી શકે છે.
2024ની ચૂંટણી પર નીતિશ કુમારની નજર
વિપક્ષી એકતા દળની મોટી બેઠક પટનામાં યોજી શકે છે
12 જૂનનાં મીટિંગ થાય તેવી શક્યતા
2024ની ચૂંટણીઓને તમામ પાર્ટીઓ ટાર્ગેટ કરી રહી છે ત્યારે નીતિશ કુમાર દેશભરનાં વિપક્ષીદળોને એકજૂથ કરવા માટે મહેનત કરી રહ્યાં છે. છેલ્લાં 15 દિવસોમાં બિહારનાં મુખ્યમંત્રી નીતિશ કુમારે કોંગ્રેસ સહિત અનેક વિપક્ષી દળનાં નેતાઓની મુલાકાત લીધી હતી. કેન્દ્રની ભાજપ સરકાર સામે લડવા માટે તમામ પાર્ટીઓ એક થઈ ભાજપને માત આપવા પ્લાનિંગ કરી રહી છે. ત્યારે શક્ય છે કે 12 જૂનનાં રોજ વિપક્ષી દળ મોટી બેઠક યોજે. આ મીટિંગ રાજધાની દિલ્હીમાં નહીં પરંતુ પટનામાં યોજાય તેવી શક્યતા છે.
સૂત્રોએ જણાવ્યું છે કે બિહારનાં CM નીતિશ કુમારે રવિવારે પટનાનાં પોતાના કાર્યાલયમાં JDU પદાધિકારીઓની એક બેઠકને સંબોધિત કરતાં વિપક્ષી એકતા દળની બેઠક અંગે જાણકારી આપી હતી. સૂત્રોનું માનીએ તો બેઠક પટનાનાં જ્ઞાન ભવનમાં થાય તેની પૂરેપૂરી સંભાવના છે.
શા માટે પટનામાં થશે બેઠક?
જાણકારી અનુસાર પટનામાં બેઠક આયોજિત કરવાનો વિચાર પશ્ચિમ બંગાળની મુખ્યમંત્રી મમતા બેનર્જીએ આપ્યો હતો. મમતા અને નીતિશ કુમારની વચ્ચે એપ્રિલમાં બેઠક થઈ હતી અને આ બેઠકમાં મમતા બેનર્જીએ જ મીટિંગ પટનામાં યોજવાનો વિચાર જણાવ્યો હતો. તેમણે કહ્યું હતું કે જયપ્રકાશનાં આંદોલનની શરૂઆત પણ બિહારથી જ થઈ હતી તેથી આ બેઠક પણ બિહારથી થાય તો સારું.
નવા સંસદ ઉદ્ગાટનનાં બહિષ્કાર બાદ લેવાયો નિર્ણય
બેઠકની આ તારીખનો નિર્ણય JDU, કોંગ્રેસ સહિત 22 વિપક્ષી દળોની તરફથી રવિવારે નવા સંસદ ભવનનાં ઉદ્ધાટન સમારોહનાં બહિષ્કાર બાદ લેવામાં આવ્યો છે. અત્રે ઉલ્લેખનીય છે કે BJPથી સંબંધ તોડીને વિપક્ષને એક કરવા માટે નીતિશ કુમાર ખુબ મહેનત કરી રહ્યાં છે. 2019ની ચૂંટણીમાં પર વિપક્ષી એકતા દળને એકજૂથ કરવાનાં પ્રયાસો કરવામાં આવ્યાં હતાં પરંતુ ચૂંટણીનાં અંત સુધીમાં તમામ નેતા અલગ અલગ અભિપ્રાય આપવા લાગ્યાં હતાં.