નવા નિયમો / હવે રસ્તા પર પી-પી...પોં-પોં નહીં સંભળાય! વાહનોના હોર્ન માટે ગડકરીએ જુઓ શું કરી જાહેરાત

• શું તમે વાહનોના હોર્નથી પરેશાન છો?, તો હવે ના થતાં
• કેન્દ્ર સરકાર ગાડીઓના હોર્નના અવાજમાં કરશે ફેરફાર
• કેન્દ્રીય મંત્રી નીતિન ગડકરીએ કરી જાહેરાત

શું છે મંત્રાલયની તૈયારી?

મોટાભાગના વાહનચાલકો અવાજનું ધ્યાન રાખતા નથી અને પ્રતિબંધિત વિસ્તારમાં પણ હોર્ન મારે છે. આમ કરવાથી ધ્વનિ પ્રદૂષણને વેગ મળે છે. કાનમાં લોખંડના સળીયાની જેમ અથડાતા હોર્નના અવાજનું આખરે સોલ્યુશન શું છે? સરકાર કોઈ પગલા કેમ ભરતી નથી? જો તમે હોર્નથી પરેશાન છો તો તમારા માટે એક આશાસ્પદ સમાચાર આવ્યાં છે. કેન્દ્ર સરકાર ગાડીઓના હોર્નના અવાજને લઇને નિયમ લાગુ કરવાની તૈયારીમાં છે. પોતાની કામગીરીને લઇને હંમેશા ચર્ચામાં રહેતા કેન્દ્રીય રોડ અને ટ્રાન્સપોર્ટ પ્રધાન નીતિન ગડકરી હોર્નના અવાજને મધુર કરવા માટે કામ કરી રહ્યાં છે.

હોર્નનો અવાજ બદલવામાં આવશે!

નીતિન ગડકરીએ નવા નિયમોને લઇને મંત્રાલયની તૈયારી અંગે જાણકારી શેર કરી છે. કેન્દ્રીય પ્રધાન નીતિન ગડકરી મુજબ, ટૂંક સમયમાં તમને ગાડીઓના હોર્નના કંટાળાજનક અવાજમાંથી મુક્તિ મળશે. તેમણે કહ્યું કે, તેમના મંત્રાલયના અધિકારીઓ કારના હોર્નનો અવાજ બદલવા પર કામ કરી રહ્યાં છે. કોઈ પાછળથી હોર્ન વગાડે અને તમને વાંસળી અથવા વાયોલિનના ધૂનનો અવાજ સંભળાય તો કેટલું સારું. સરકાર કંઈક આવી તૈયારી કરી રહી છે. નીતિન ગડકરી મુજબ, આગામી સમયમાં વાહનોના હોર્નના કંટાળાજનક અવાજમાંથી મુક્તિ મળશે. હોર્નના કંટાળાજનક અવાજના બદલે ભારતીય સંગીત વાદ્યયંત્રોની મધુર ધ્વનિ સંભળાશે.

કેન્દ્રીય મંત્રીએ સંભળાવ્યો પોતાનો અનુભવ

નીતિન ગડકરીએ પોતાનો અનુભવ સંભળાવતા કહ્યું કે, તેઓ નાગપુરમાં 11મા માળે રહે છે. દરરોજ સવારે 1 કલાક પ્રાણાયામ કરે છે અને આ દરમ્યાન રસ્તા પર સંભળાતા હોર્ન તેમના 1 કલાકના ધ્યાનમાં ખલેલ પહોંચાડે છે. આ પરેશાનીને સહન કરતા તેમના મનમાં વિચાર આવ્યો કે વાહનોના હોર્ન કંટાળાજનક નહીં પરંતુ મધુર હોવા જોઈએ. તેમણે કહ્યું, અમે વિચારવાનું શરૂ કર્યુ છે કે કારના હોર્નનો અવાજ ભારતીય સંગીતના સાધનો અનુસાર હોવો જોઈએ અને અમે તેની પર કામ કરી રહ્યાં છીએ.