NITI Aayog Report / દેશના ટોપ 5 ગરીબ રાજયોમાંથી ચાર ભાજપ શાસિત, જુઓ ગુજરાત કેટલામાં નંબરે

• નીતિ આયોગે જાહેર કર્યો Multidimensional Poverty Index
• ગરીબ રાજ્યોની યાદીમાં ઉત્તરપ્રદેશ પ્રથમ ક્રમે
• ગુજરાત આ યાદીમાં 13 માં ક્રમે 

નીતિ આયોગે દેશનો પહેલો Multidimensional Poverty Index એટલે કે બહુઆયામી ગરીબી સૂચકાંક (MPI) નો રિપોર્ટ જાહેર કર્યો છે, જે બાદ રાજકીય પારો ગરમાયો છે. 

ટોપ પાંચ રાજ્યોમાંથી ચાર ભાજપ શાસિત

કમિશન દ્વારા બહાર પાડવામાં આવેલા આંકડાઓમાં, ગરીબીની દ્રષ્ટિએ ટોચ પર રહેલા પાંચ રાજ્યોમાંથી ચાર ભાજપ શાસિત રાજ્યો છે. ક્યાંક ભાજપ પાસે પૂર્ણ બહુમતી ધરાવતી સરકાર છે તો ક્યાંક દોઢ દાયકા જૂની ગઠબંધન સરકાર છે. ગરીબોની વસ્તીના સંદર્ભમાં ઉત્તર પ્રદેશ તેમાં ટોચ પર છે.

નીતિ આયોગ દ્વારા બહાર પાડવામાં આવેલા સૂચકાંક અનુસાર, બિહારની 51.91 ટકા વસ્તી ગરીબ છે. અહીં નીતિશ કુમારના નેતૃત્વમાં ભાજપ અને જેડીયુ ગઠબંધનની દોઢ દાયકા જૂની સરકાર છે, જ્યારે ડિસેમ્બર 2019 પહેલા ભાજપ દ્વારા શાસિત ઝારખંડમાં હાલ 42.16 ટકા વસ્તી ગરીબ છે. દેશના સૌથી મોટા રાજ્ય ઉત્તર પ્રદેશમાં 37.79 ટકા વસ્તી ગરીબીમાં જીવે છે.

2011ની વસ્તી ગણતરી મુજબ યુપીની વસ્તી 19.98 કરોડ છે. તેની 37.79 ટકા વસ્તી એટલે કે 7.55 કરોડની વસ્તી ગરીબ છે. 2011ની વસ્તી ગણતરી મુજબ બિહારની વસ્તી 10.4 કરોડ છે. તેની લગભગ 52 ટકા વસ્તી એટલે કે 5.4 કરોડ વસ્તી ગરીબીમાં જીવે છે.

ઇન્ડેક્સમાં મધ્યપ્રદેશ (36.65 ટકા) ચોથા ક્રમે છે, જ્યારે મેઘાલય (32.67 ટકા) પાંચમા સ્થાને છે. મધ્યપ્રદેશમાં પણ 2003 થી ભાજપની સરકાર છે (ડિસેમ્બર 2018 થી માર્ચ 2020 સિવાય) અને શિવરાજ સિંહ ચૌહાણ 2005 થી મુખ્યમંત્રી છે.  તો વળી મેઘાલયમાં પણ ભાજપની ગઠબંધન સરકાર છે.

આ સૂચકાંકમાં સીપીએમ શાસિત કેરળમાં 0.71 ટકા, ભાજપ શાસિત ગોવામાં 3.76 ટકા, સિક્કિમમાં 3.82 ટકા, તમિલનાડુમાં 4.89 ટકા અને પંજાબમાં 5.59 ટકા છે. આ રાજ્યો સમગ્ર દેશમાં સૌથી ઓછી ગરીબ વસ્તી ધરાવતા રાજ્યોમાં સામેલ છે અને ઇન્ડેક્સમાં સૌથી નીચે છે.

આ ઇન્ડેક્સમાં ગુજરાતની 18.60 % વસ્તી ગરીબ હોવાનું જણાવવામાં આવ્યું છે.  આ હિસાબે ગુજરાત દેશમાં 13 માં ક્રમે આવે છે.