ગુજરાતમાં 'નિસર્ગ' વાવાઝોડાના સંકટ વચ્ચે આજે અમદાવાદ, બોટાદ, અમરેલી, ભાવનગર અને ડાંગ સહિત અનેક જિલ્લામાં વાતાવરણમાં પલટો જોવા મળ્યો છે. રાજ્યના અનેક જિલ્લામાં નિસર્ગ વાવાઝોડાની અસર જોવા મળી છે. ત્યારે કેટલાક વિસ્તારોમાં વરસાદ શરૂ થઇ ચૂક્યો છે.
નિસર્ગ વાવાઝોડાની અસર જોવા મળી
અમદાવાદના કેટલાક વિસ્તારોમાં વરસાદી ઝાપડું
રાજ્યના અનેક વિસ્તારમાં વરસાદ ખાબક્યો
વાવાઝોડાની આગાહી વચ્ચે ગુજરાતમાં વાતાવરણ પલટાયુ છે. અમદાવાદમાં વાદળછાયા વાતાવરણ બાદ વરસાદ થયો છે. શહેરના પૂર્વ અને પશ્ચિમના કેટલાંક વિસ્તારોમાં વરસાદી ઝાપટુ પડ્યું છે. અમદાવાદના ખોખરા, અમરાઈવાડી, હાટકેશ્વર, નરોડા, સરખેજ, મણિનગર, નારોલ, ઇસનપુર, ઘોડાસર, વટવા, જશોદાનગર, સરસપુર, ઓઢવ, રખિયાલ, શિવરંજની, માનસી ચાર રસ્તા, યુનિવર્સિટી સહિતના વિસ્તારમાં વરસાદ થયો છે. અમદાવાદના પૂર્વ વિસ્તારમાં પણ વીજળીના કડાકા સાથે વરસાદ વરસ્યો છે. બહેરામપુરા વિસ્તારમાં ભારે પવનને કારણે વૃક્ષ ધરાશાયી થયું છે. વૃક્ષ રોડ પર ધરાશાયી થતા એકબાજુનો માર્ગ બંધ થયો છે. વરસાદ પડતાં શહેરીજનોને ગરમીમાં આંશિક રાહત થઇ છે.
બોટાદ શહેરમાં દિવસભર વરસાદી માહોલ બાદ રાત્રે વરસાદ ચાલુ થયો હતો. બોટાદ શહેરમાં સતત ત્રીજા દિવસે વરસાદ વરસ્યો હતો. પવન અને ગાજવીજ સાથે અનેક વિસ્તારોમાં વરસાદ વરસ્યો હતો. વલસાડના આસપાસના કેટલાક ગામડાઓમાં પણ હળવા વરસાદી ઝાપટા પડ્યાં હતા.
અમરેલીના ધારી પંથકમાં ભારે પવન સાથે વરસાદના કારણે નુકસાન થયાની ઘટના સામે આવી છે. ધારી શહેરમાં અનેક હોર્ડિંગ્સ અને છાપરા ઉડ્યા છે. શહેરમાં કેટલાક વિસ્તારોમાં વૃક્ષો પણ ધરાશાયી થયા છે. ભારે પવન સાથે વરસાદ ખાબકતા કેરીના પાકને નુકસાન થયું છે.
ભાવનગરમાં આજે 1 ઇંચ કરતા વધુ વરસાદ ખાબક્યો હતો. વરસાદથી કુંભારવાડા વિસ્તારમાં પાણી ભરાયા હતા. નીચાણવાળા વિસ્તારના ઘરોમાં પણ પાણી ઘુસ્યા હતા. પ્રી-મોન્સુન કામગીરીની તાકીદે જરૂર છે. મહત્વનું છે કે વાવાઝોડાની અગાહીને પગલે દ.ગુજરાત અને સૌરાષ્ટ્રના તંત્ર દ્વારા સાવચેતીના પગલાં લેવામાં આવી રહ્યા છે.
ડાંગના આહવા સહિત અનેક વિસ્તારોમાં વરસાદ વરસ્યો હતો. આહવા, સુબિર અને સાપુતારામાં ધોધમાર વરસાદ વરસ્યો હતો. વહીવટી તંત્ર દ્વારા લોકોને સાવચેતી રાખવા અપીલ કરાઇ છે.