રાહત કે પછી? / પેટ્રોલ-ડીઝલના ભાવને લઇ નિર્મલા સીતારમણનો સૌથી મોટો સંકેત, જાણો શું છે સરકારનો માસ્ટર પ્લાનિંગ?

• ક્રૂડ ઓઈલની વધતી કિંમતો અંગે સરકાર ચિંતામાં
• ચોક્કસપણે તેની ભારતીય અર્થવ્યવસ્થા પર અસર પડશે
• કેન્દ્ર સરકાર વૈકલ્પિક સ્ત્રોતોનો ઉપયોગ કરવાનું વિચારી રહી છે

કેન્દ્રીય નાણામંત્રી નિર્મલા સીતારમણે મંગળવારે યુક્રેન સંકટના કારણે ક્રૂડ ઓઈલની વધતી કિંમતો અંગે ચિંતા વ્યક્ત કરી હતી અને સંકેત આપ્યો હતો કે, કેન્દ્ર સરકાર વૈકલ્પિક સ્ત્રોતોનો ઉપયોગ કરવાનું વિચારી રહી છે. ભારતીય જનતા પાર્ટીના કર્ણાટક એકમ દ્વારા આયોજિત એક સંવાદ સત્રમાં નિર્મલા સીતારમણને ક્રૂડ ઓઇલની વધતી કિંમતો તેમજ યુક્રેન-રશિયા સંઘર્ષની ભારતીય અર્થવ્યવસ્થા પરની અસર વિશે પૂછવામાં આવ્યું હતું.

ચોક્કસપણે તેની ભારતીય અર્થવ્યવસ્થા પર અસર પડશે

નાણામંત્રીએ કહ્યું કે, "ચોક્કસપણે તેની ભારતીય અર્થવ્યવસ્થા પર અસર પડશે." તેમણે વધુમાં જણાવ્યું હતું કે, "આપણે આને પડકારના રૂપમાં લેવા અને તેની અસરને ઘટાડવા માટે કેટલા તૈયાર છીએ, આ બધું એવું છે, જે આપણે આગળ જોઇશું." તેમણે ઉમેર્યું કે, 'ભારત ક્રૂડ ઓઈલની કુલ જરૂરિયાતના 85 ટકાથી વધારે હિસ્સો આયાતથી પૂર્ણ કરે છે અને જ્યારે ઓઇલની કિંમત વધે છે, ત્યારે તે એક ચિંતાનો વિષય છે.'

નાણામંત્રીએ વધુમાં કહ્યું કે, આપણે એ જોવું પડશે કે તે કઈ દિશામાં આગળ વધે છે. તેમણે કહ્યું કે, ઓઈલ માર્કેટિંગ કંપનીઓ 15 દિવસની સરેરાશના આધારે છૂટક કિંમતો નક્કી કરે છે પરંતુ "હવે આપણે જે આંકડાઓ વિશે વાત કરી રહ્યાં છીએ તે એવરેજથી વધુ છે".

તેમણે જણાવ્યું કે, 'સરકાર ક્રૂડ ઓઇલ મેળવવા માટે વૈકલ્પિક સ્ત્રોત શોધી રહી છે, પરંતુ સાથે એ પણ જોડ્યું કે, વૈશ્વિક બજારમાં તમામ સ્ત્રોતો સમાન રીતે અકલ્પનીય છે. ક્રૂડ ઓઈલની વધતી કિંમતોની અસર જરૂરથી પડશે અને બજેટમાં કેટલીક જોગવાઈઓ કરવામાં આવી છે, પરંતુ તે માત્ર સામાન્ય વધઘટ પર જ આધારિત છે, પરંતુ હવે સ્થિતિ તેનાથી આગળ છે.

પેટ્રોલ-ડીઝલ પહેલેથી જ GST પરિષદમાં છે : કેન્દ્રીય નાણામંત્રી

તેઓએ વધુમાં કહ્યું કે, 'એટલાં માટે આપણે એ જોવું પડશે કે, આપણે આનું સોલ્યુશન કઇ રીતે લાવી શકીએ.' આંતરરાષ્ટ્રીય તેલ પ્રમાણભૂત બ્રેન્ટ ક્રૂડ મંગળવારનાં અંદાજે 127 ડૉલર પ્રતિ બેરલના ભાવ પર હતું. પેટ્રોલ અને ડીઝલને જીએસટીના દાયરામાં લાવવા વિશે પૂછવા પર તેઓએ જણાવ્યું કે, ''તે પહેલેથી જ (GST પરિષદના સમક્ષ) છે. પેટ્રોલ-ડીઝલ પહેલેથી જ GST પરિષદમાં છે.''