બેદરકારી / ઉત્તર બિહારમાં ચમકીથી વધુ 9 બાળકોનાં મોત, અત્યાર સુધીમાં 144નો લેવાયો ભોગ

મુઝફ્ફરપુરઃ ઉત્તર બિહાર (Bihar) ના મુઝફ્ફરપુર અને તેની આસપાસના જિલ્લાઓમાં એક્યુટ ઈન્સેફ્લાઈટિસ સિન્ડ્રોમ (એઈએસ) એટલે કે ચમકી તાવ (Chamki Fever) થી બાળકોનાં મોતનો સિલસિલો ચાલુ જ છે. ૧૮મા દિવસે મંગળવારે વધુ નવ બાળકોએ આ રહસ્યમય તાવના કારણે જીવ ગુમાવ્યો છે. મુઝફ્ફરપુરની એસકેએમસીએચ હોસ્પિટલમાં પાંચ, સમસ્તીપુર સદર હોસ્પિટલમાં બે અને બેતિયા મેડિકલ કોલેજ તથા મોતિહારી સદર હોસ્પિટલમાં એક-એક બાળકનાં મોત થયાં છે.

મુઝફ્ફરપુરમાં અત્યાર સુધીમાં કુલ ૧૪૪ બાળકોનાંમોત થવાથી લોકોમાં તંત્ર સામે ભારે રોષ છે. એસકેએમસીએચ અને કેજરીવાલ હોસ્પિટલમાં ૩૯ નવા કેસ નોંધાયા છે અને હાલ આ બાળકો સારવાર હેઠળ છે. ૧૮ દિવસમાં એઈએસના ૪૩૦થી વધુ કેસ સામે આવતાં તંત્ર પણ દોડતું થઈ ગયું છે. બિહાર સરકાર તરફથી હજુ સુધી જો કે ફક્ત ૯૦ બાળકોનાં મોતની જ પુષ્ટિ કરવામાં આવી છે, પણ સ્થાનિક લોકોનો આક્ષેપ છે કે તંત્ર પોતાની નિષ્ફળતા છુપાવવા માટે સાચા આંકડા જાહેર કરતું નથી.

સૂત્રોનાં જણાવ્યાં અનુસાર, હાલ ૩૦૦થી વધુ બાળકોની સ્થિતિ અત્યંત ગંભીર છે અને તેમને યોગ્ય સારવાર પણ મળી રહી નથી. સૌથી ચિંતાજનક વાત એ છે કે, મૃત્યુ પામનારા અને ગંભીર રીતે બીમારમાંથી ૮૦ ટકા બાળકીઓ છે. ઘણાં બાળકો સારવારના અભાવે મોતને ભેટ્યા હોવાનો આરોપ પણ તેમના પરિવારજનોએ કર્યો છે. બિહારનાં મુખ્યપ્રધાન નીતિશકુમાર અને તેમની સરકાર સામે અનેક ગંભીર સવાલો ઉઠી રહ્યા છે.

રાજ્યનું આરોગ્ય તંત્ર સાવ ખાડે ગયું છે અને છતાં પણ નીતિશકુમાર સુશાસનના દાવા કરી રહ્યા હોવાથી લોકોની નારજગી વધી છે. ચમકી તાવથી દુનિયાનાં ૨૪ દેશ પરેશાન: ભારતમાં આઠ વર્ષમાં ૧૧ હજારનાં મોત એઈએસ એટલે કે ચમકી તાવ ફક્ત ભારતમાં બાળકોનાં જીવનો દુશ્મન નથી બન્યો પણ દક્ષિણ-પશ્ચિમ એશિયા અને પશ્ચિમી પ્રશાંતનાં ૨૪ દેશ તેનાથી પરેશાન છે.

વર્લ્ડ હેલ્થ ઓર્ગેનાઈઝેશન (WHO)ના રિપોર્ટ અનુસાર, આ ૨૪ દેશોના અંદાજે ૩૦૦ કરોડ લોકો પર રહસ્યમય ચમકી તાવના ચેપનો ખતરો સતત રહે છે. ભારતમાં ૨૦૧૧થી અત્યાર સુધીમાં એટલે કે આઠ વર્ષમાં એઈએસ અને જાપાનીઝ ઈન્સેફ્લાઈટીસ (જેઈ) એટલે કે ચમકી તાવથી ૧૧હજાર કરતાં પણ વધુ લોકોનાં મોત થયાં છે. તેમાંથી ૯૯ ટકા પીડિત ૧૫ વર્ષથી નાની ઉંમરનાં હતાં.