હુક્કાબારમાં થયેલી રેડ મામલે ખુલાસા થયા. સેમ્પલ કબ્જે લીધા બાદ FSLમાં મોકલાતા હર્બલ હુક્કામાં નિકોટીન નાખી ગ્રાહકોને સેવન કરાવાતું હોવાનું સામે આવતા ચારની ધરપકડ કરાઇ છે.
અમદાવાદના સેક્રેડ 9 કાફેમાં રેડનો મામલો
17 જુલાઈના દિવસે રેડ પાડી હતી
આ કેસમાં હવે આવ્યો નવો વળાંક
અમદાવાદના સેક્રેડ 9 કાફેમાં રેડની ઘટના આમ તો જૂની છે. પરંતુ હવે આ મામલે નવો વળાંક આવ્યો છે. 17 જુલાઈના દિવસે ડિજી વિજિલન્સની ટીમે સેક્રેડ 9 કાફેમાં રેડ કર્યા બાદ હવે વધુ એક ગુનો નોંધાયો છે. રેડ કરાઈ ત્યારે અહીંથી યુવક-યુવતી સહિત 68 લોકોને પકડવામાં આવ્યા હતા. ડિજી વિજિલન્સએ કાફેના સંચાલક સહિત 4 વિરુદ્ધ જાણવાજોગ નોંધ કર્યા બાદ FSLના રિપોર્ટમાં ખુલાસો થતા ગુનો નોંધાયો છે.
હર્બલ હુક્કામાં નિકોટીન નાખી હુક્કા પીરસતા હતા
આરોપીઓ હર્બલ હુક્કામાં નિકોટીન નાખીને હુક્કા પીરસતા હોવાનું સામે આવ્યું છે. તેને આધારે ગુનો નોંધી. કેવલ પટેલ, આશિષ પટેલ, ધ્રુવ ઠાકર અને કરણ પટેલ આ ચાર શખ્સની ધરપકડ કરી છે. આ આરોપીઓ યુવા પેઢીને હુક્કાના રવાડે ચઢાવી રહ્યા હતા. આરોપીઓ બોપલ એસ.પી. રિંગરોડ પર સેક્રેડ 9 કાફેના નામે હુક્કાબાર ચલાવી રહ્યા હતા. વિજિલન્સએ રેડ કરી હતી ત્યારે 68 લોકોના નિવેદન લેવામાં આવ્યા હતા. આ કાફે માંથી જુદા જુદા ફ્લેવરના હુક્કા મળી આવતા પોલીસે 13 હર્બલ ફ્લેવર અને 29 જેટલા હુક્કાઓ જપ્ત કર્યા હતા. જેમાં નિકોટીન હોવાનું રિપોર્ટમાં સામે આવતા પ્રોહીબિશનના ગુના બાદ વધુ એક ગુનો નોંધવામાં આવ્યો છે.
3થી 4 માસથી આ ચાલતું હતું હુક્કાબાર
પકડાયેલા હુક્કાબારના સંચાલકોમાંથી મુખ્ય કેવલ પટેલ અને આશિષ પટેલ છે. કેવલ પટેલે કાફે હુક્કાબાર માટે ભાડે આપ્યું હતું. છેલ્લા 3થી 4 માસથી આ હુકકબાર ચાલતું હતું. એટલું જ નહીં કેવલ પટેલની સેક્રેડ 9 નામથી કન્સ્ટ્રકશનની સ્કીમ પર બોપલમાં બની રહી છે. ત્યારે ડિજી વિજિલન્સ હુક્કાબારને લઈને જાણવા જોગનોંધ કરીને વધુ કાર્યવાહી હાથધરી ગુનો નોંધાયો છે.
સેક્રેડ 9 હુક્કાબારમાં અગાઉ સ્થાનિક પોલીસે રેડ પાડી
નોંધનીય છે કે હુક્કાબાર સંચાલકો દ્વારા હાઇકોર્ટમાં હર્બલ હુક્કાની પરમિશન માંગી હતી. જેને લઈ હજી કોઈ ચુકાદો આવ્યો નથી, પરંતુ શહેરમાં હર્બલ હુક્કાબાર ચાલી રહ્યા છે. તેવું લોકોને લાગી રહ્યું છે. જ્યારે નિકોટીન મળી આવતા નવો જ વળાંક આવ્યો છે. આરોપીની ધરપકડ કરી છે. સેક્રેડ 9 હુક્કાબારમાં અગાઉ સ્થાનિક પોલીસે રેડ પાડી હતી. જેમાં હર્બલ હુક્કા મળી આવતા કોઈ કાર્યવાહી કરાઈ ન હતી. ત્યારે ડિજી વિજિલન્સની ટીમે હુકકાબારની સામગ્રી અને આરોપીને ઝડપી પાડી જામીન પર મુક્ત કર્યા છે. હવે હુક્કામાં નિકોટીન મળી આવતા ચારેય લોકોની ધરપકડ કરવામાં આવી છે. આરોપીની પુછપરછમાં નવા નવા ખુલાસા સામે આવી શકે છે.