બોલિવૂડ હોય કે હોલિવૂડ સેલેબ્રિટીના અંગત જીવનને લઇને ફેન્સથી લઇને મીડિયા ખૂબ જ રસ ધરાવે છે અને જ્યારે વાત સેલિબ્રિટીસના લગ્નજીવનની હોય તો ફેન્સ અને મીડિયા બધું જ જાણવા આતુર રહે છે. આવું જ કંઈક પ્રિયંકા ચોપડા અને તેના પતિ નિક જોનાસ સાથે થઈ રહ્યું છે. બંનેના લગ્નને 1 વર્ષ થઇ ગયું છે. પરંતુ આજે પણ આ બંનેની ઉંમર વચ્ચે જે મોટો ગેપ છે તેને લઈને ચર્ચાઓનો સિલસિલો શાંત જ થતો નથી. હાલમાં જ પ્રિયંકાના પતિ નિક જોનાસને એક ઈન્ટરવ્યૂમાં એજ ગેપને લઈને સવાલ કરવામાં આવ્યો ત્યારે નિકે જોરદાર જવાબ આપ્યો હતો.
નિક-પ્રિયંકા વચ્ચેનું એજ ગેપ ફરી ચર્ચામાં
પ્રિયંકાના પતિ નિકે કહી આ વાત
ટ્રોલર્સને આ કપલ આપે છે જડબાતોડ જવાબ
આ વાતનો બધાં જ જાણે છે કે નિક જોનાસ પ્રિયંકા ચોપડાથી 10 વર્ષ નાનો છે. તેની ઉંમર 27 વર્ષ છે અને પ્રિયંકાની ઉંમર 37 વર્ષ છે. હાલમાં જ નિક એક સિંગિંગ રિયાલિટી શો 'ધ વોઈસ' ને લઇને ખૂબ ચર્ચામાં છે. નિક જોનાસ આ સિંગિંગ રિયાલિટી શોના જજ છે. નિક સિવાય આ શોમાં એક બીજી જજ કૈલી ક્લાર્કસન પણ છે. કૈલી નિકની સારી મિત્ર છે અને બંને વચ્ચે મજાક મસ્તી ચાલતી રહે છે.
નિક સાથે મસ્તી મજાક કરતાં કૈલીએ તેને પૂછે છે કે, મારી ઉંમર 37 વર્ષની છે અને તમારી 27 વર્ષ છે ને? આના પરથી નિક સમજી ગયો કે કૈલી શું કહેવા માંગી રહી છે.
કૈલીની આ વાત પર નિકે તરત જ જવાબ આપતા કહ્યું, મારી પત્નીની ઉંમર 37 વર્ષ છે અને મને આ વાતથી કોઇ વાંધો નથી. નિકના આ શાનદાર જવાબને સાંભળતા ત્યાં હાજર ઓડિયન્સે જોરદાર તાળીઓ તેના આ જવાબને આવકાર્યો હતો. તો બીજી બાજુ નિક આ મોમેન્ટને એન્જોય કરતા જોવા મળ્યો હતો. નિકના આ જવાબની સાથે પ્રિયંકા અને નિકના એજ ગેપને લઈને સવાલ કરતાં લોકોને પણ જવાબ મળી ગયો હશે.
જોકે, માત્ર નિકને જ આવા સવાલો નથી કરવામાં આવતા પણ આ પહેલાં પ્રિયંકા ચોપડા પણ આવા સવાલનો સામનો કરી ચૂકી છે. એક ઇન્ટરવ્યૂમાં પ્રિયંકાએ નિકની ઉંમર પર જવાબ આપતા કહ્યું હતું કે મને આ વાત પર કોઇ ફર્ક નથી પડતો. મને લાગે છે કે મીડિયા અમારા સંબંધ કરતા ટ્રોલર્સને વધુ મહત્વ આપે છે. અમે આવા ટ્રોલર્સ વિશે વાત કરવાનું પણ પસંદ નથી કરતા.
આગળ પ્રિયંકાએ કહ્યું, કે આવા 150 લોકોના કહેવા પર પણ હું મારો વિચાર નહીં બદલું. આ બંને કપલના જવાબથી એવું કહેવામાં બિલ્કુલ અતિશયોક્તિ નથી કે આ બંને પાવર કપલ છે.