રાજ્યના નવા પોલીસ વડાની વરણી માટે રાજ્યના ચીફ સેક્રેટરી અનિલ મુકીમ અને એડિશનલ ચીફ સેક્રેટરી ગૃહ વિભાગ સંગીતા સિંઘ UPSC સાથે દિલ્હી ખાતે મિટિંગ કરવા જઈ રહ્યા છે. તેઓ આજે દિલ્હી જવા રવાના થશે જ્યાં તેઓ 31 જુલાઈએ મિટિંગમાં હાજર રહેશે.
રાજ્યના નવા DGPની વરણી 31મી જુલાઈએ થશે
પોલીસ કમિશનર આશિષ ભાટિયાનું નામ મોખરે
અમદાવાદ, વડોદરા અને રાજકોટના પો.કમિ.ની પણ બદલીની શક્યતા
નોંધનીય છે કે રાજ્ય સરકારે કેન્દ્રીય જાહેર સેવા આયોગ (UPSC)ને નવા DGP માટે નામોની યાદી મોકલી આપી છે જેમાંથી UPSC દ્વારા 3 નામો શોર્ટલિસ્ટ કરીને તેમાંથી રાજ્ય સરકાર રાજ્યના નવા પોલીસ વડાની પસંદગી કરશે.
અમદાવાદના પોલીસ કમિશનર આશિષ ભાટિયા જેઓ 1985ની ગુજરાત કેડરના IPS અધિકારી છે તેઓ રાજ્યના DGPની રેસમાં ફ્રન્ટ રનર માનવામાં આવે છે.
મહત્વનું છે કે શિવાનંદ ઝા આમ તો આ વર્ષના એપ્રિલ મહિનામાં રિટાયર્ડ થવાના હતા પરંતુ કોરોના મહામારીને કારણે તેમનો ત્રણ મહિનાનો કાર્યકાળ લંબાવાયો હતો. અંદરના સૂત્રોના જણાવ્યા પ્રમાણે શિવાનંદ ઝાએ ત્રણ મહિના માટે વધુ એક વખત પોતાનો કાર્યકાળ લંબાવવા માટે પ્રયાસો કરી ચૂક્યા હતા. પરંતુ આ વખતે દિલ્હીથી રાજ્યમાં નવા DGP માટેની તૈયારીઓ શરૂ કરવાના આદેશ આપી દેવાયા હતા.
રાજ્યમાં નવા DGPની વરણી સાથે પોલીસ બેડામાં મોટા પ્રમાણમાં બદલી થશે તેમ માનવામાં આવે છે. આ બદલીમાં અમદાવાદ, વડોદરા અને રાજકોટના પોલીસ કમિશનરની પણ બદલી થશે તેવી શક્યતાઓ છે.