રાજ્યમાં ચારે તરફ વરસાદી માહોલ છવાયેલો છે. વડોદરા અને રાજકોટમાં મેઘરાજાએ ધમાકેદાર બેટિંગ કરી છે. જ્યારે હવામાન વિભાગ દ્વારા આગામી 5 દિવસ સુધી રાજ્યામાં ભારે વરસાદની આગાહી કરવામાં આવી છે.
સુરતમાં પણ ભારે વરસાદ પડ્યો છે. જેના કારણે કેટલાક વિસ્તારોમાં પાણી ભરાઇ ગયા છે. રાજકોટમાં 8 ઇંચ વરસાદ પછી જનજીવન સમાન્ય થઇ રહ્યું છે. તો વડોદરામાં પૂર પછી હાલ કોઇ વરસાદ નથી. જ્યારે અમદાવાદમાં સવારથી સામાન્ય વરસાદી છાંટા પડી રહ્યા છે. તો વલસાડ જિલ્લામાં છેલ્લા એક અઠવાડિયાથી વરસાદની હેલી જામી છે. આજે પણ જિલ્લામાં વરસાદની હેલી યથાવત રહી છે. જિલ્લાના ઉપરવાસના કપરાડા અને ધરમપુર તાલુકામાં ભારે વરસાદને કારણે જિલ્લાના તમામ નદી-નાળાઓ બે કાંઠે વહી રહ્યા છે.
રાજ્યમાં અત્યાર સુધી સરેરાશ 49 ટકા વરસાદ પડ્યો છે. જ્યારે આજે અને આવતી કાલે વધુ વરસાદની આગાહી કરવામા આવી છે. દક્ષિણ ગુજરાત અને સૌરાષ્ટ્રમાં ભારે વરસાદ પડી શકે છે. તો અમરેલી, દીવ અને સોમનાથમાં પણ વરસાદ પડી શકે છે. હવામાન વિભાગનું અનુમાન છે કે આગામી દિવસોમાં વરસાદી સિસ્ટમ યથાવત રહેવાની છે.