હવામાન વિભાગની આગાહી મુજબ રાજ્યના કેટલાક ભાગો પર હજુ વરસાદી સિસ્ટમ સક્રિય છે. જેને લઈને આગામી 24 કલાક અનેક વિસ્તારોમાં વરસાદ થશે. મધ્ય ગુજરાત અને દક્ષિણ ગુજરાતમાં વરસાદની શક્યતા છે.
જ્યારે નવસારી, વલસાડ, પંચમહાલ અને દાહોદમાં વરસાદ થશે. તો સુરત,વડોદરા અને અમદાવાદમાં ભારે વરસાદની શક્યતા છે. હવામાન વિભાગ કરેલી આગાહી પ્રમાણે ઉત્તરગુજરાત અને સૌરાષ્ટ્રમાં દિવસભર વરસાદી માહોલ રહેશે. શિયરઝોન વરસાદી સિસ્ટમના કારણે ભારે વરસાદની શક્યતા સેવાઈ રહી છે.
નર્મદા ડેમ ઐતિહાસિક સપાટીએ
નર્મદા ડેમમાં પાણીનો સતત પાણીની આવકમાં વધારો થઇ રહ્યો છે. હાલમાં ઇતિહાસમાં પ્રથમવાર સપાટી 136.51 મીટર પહોંચી છે. હાલ 6 લાખ 77 હજાર ક્યુસેક પાણીની આવક થઈ છે. અને 23 દરવાજા 3.9 મીટર સુધી ખોલીને 5 લાખ 85 હજાર ક્યુસેક પાણી નદીમાં છોડાઈ રહ્યું છે.
હાલ ડેમમાં 5 હજાર જેટલો mcmનો લાઈવ સ્ટોક સંગ્રહ થઈ છે. તો આવક વધુ રહે તો 1 કલાકમાં જ ડેમમાંથી 10 લાખ ક્યુસેક સુધી પાણી છોડવાની શકયતા રહેલી છે. નર્મદા નિગમની વડોદરાની ઓફિસ દ્વારા આ પત્ર જાહેર કરવામાં આવ્યો છે.
નર્મદા, ભરૂચ અને વડોદરાના કાંઠા વિસ્તારને એલર્ટ આપવામાં આવ્યું છે. ત્રણેય જિલ્લા કલેકટરને આ અંગે સાવચેત કરવામાં આવ્યા છે. આ અંગે નર્મદા નિગમના મેનેજીંગ ડિરેક્ટર ગુપ્તાએ જણાવ્યુ હતું કે નર્મદા, ભરૂચ અને વડોદરાના સ્થાનિકોએ ગભરાવવાની જરૂર નથી. દરેક જગ્યાએ NDRFની ટિમો તૈનાત કરવામાં આવી છે.
સૌરાષ્ટ્રમાં વરસાદની છેલ્લી બેટીંગ
સમગ્ર ગુજરાતમાં વરસાદની છેલ્લી બેટીંગ તોફાની રહી છે. તો સૌરાષ્ટ્રના જૂનાગઠ, ભાવનગર, રાજકોટમાં સારો વરસાદ થયો છે. આમ જૂનાગઢના મેંદરડા તાલુકામાં પણ ધોધમાર વરસાદ થયો છે. આ વરસાદથી મઘુવંતી ડેમમાં પાણીની સારી એવી આવક થઇ છે. ઉપરવાસમાં વરસાદથી મઘુવંતી ડેમ ઓવરફ્લો થયો છે.
જૂનાગઢમાં એક કલાકમાં 4 ઇંચ
જૂનાગઢમાં એક કલાકમાં 4 ઇંચ વરસાદ થયો છે. આથી ભવનાથ મંદિર પાસે ગોઠણ સુધીના પાણી ભરાય ગયા છે. દામોદર કુંડ અને નદી-નાળા છલકાયા ગયા છે. નદી-નાળામાં પાણીની આવક થતા લોકોમાં ખુશી જોવા મળી છે.
અમદાવાદમાં ભારે વરસાદ
અમદાવાદમાં ખાબકેલા ધોધમાર વરસાદને કારણે શહેરમાં અનેક જગ્યાએ પાણી ભરાઈ ગયા છે. ત્યારે આ મામલે મ્યુનિસિપલ કમિશનર વિજય નહેરાનું કહ્યું કે શહેરમાં 4 વાગ્યા સુધીમાં સાડા ત્રણ ઈંચ વરસાદ વરસ્યો હતો. જ્યારે છેલ્લા એક કલાકમાં દોઢ ઈંચ વરસાદ ખાબક્યો હતો. જેના કારણે કેટલાક વિસ્તારમાં પાણી ભરાઈ ગયા છે.
જો કે પાણી કાઢવાની કામગીરી હાલ ચાલી રહી છે. શહેરના તમામ અંડરપાસ ખુલ્લા છે અને વાહન ચાલકો પસાર થઈ રહ્યા છે. તો સાબરમતી નદીનું લેવલ જાળવવા માટે હાલ કામ ચાલી રહ્યું છે.
AMC કમિશનર નહેરાએ વધુ કહ્યું કે વાસણા બેરેજના 6 દરવાજા ખોલવામાં આવ્યા છે અને 11 હજાર ક્યુસેક પાણીનો નિકાલ કરવામાં આવી રહ્યો છે. શહેરના તળાવોમાં પાણીની સારી આવક થઈ છે. શહેરમાં 38 જગ્યાએ વૃક્ષો પડવાની ઘટનાઓ બની હતી. જેને દૂર કરવાની કામ હાલ ચાલી રહ્યું છે.
કચ્છ જિલ્લો પણ વરસાદથી તરબોળ
કચ્છ જિલ્લો પણ વરસાદથી તરબોળ થયો છે.કચ્છ જિલ્લામાં થયેલા ભારે વરસાદથી નદી નાળા છલકાઈ ગયા છે. તો બીજી તરફ કેટલીક નદીઓમાં પૂરની સ્થિતિ સર્જાઈ છે. જેના કારણે વાતાવરણ પણ આહલાદક બન્યું છે. કચ્છમાં વહેતી નાગમતી નદીમાં પાંચ વર્ષ બાદ નવા નીર આવ્યા છે. જેના કારણે ખેડૂતોમાં પણ ખુશીનો માહોલ છવાયો છે.
ભરૂચમાં ભયજનક સ્થિતિ
ભરૂચમાં નર્મદા નદીનું જળસ્તર વધ્યું છે. નદીનું જળસ્તર વધતા કાંઠા વિસ્તારના ગામોને એલર્ટ કરાયા. જળસ્તર વધતા કિનારા વિસ્તારમાંથી લોકોનું સ્થળાંતર કરવામાં આવ્યું નથી. કડોદ અને નિકોરા બેટ ખાતેથી લોકોનું સ્થળાંતર કરવામાં આવ્યું છે. પોલીસ દ્વારા 25થી વધુ લોકોનું સ્થળાંતર કરવામાં આવ્યું છે. ગોલ્ડન બ્રિજ નજીક જળ સપાટી 28.5 ફૂટે પહોંચી છે. અને નર્મદા નદીએ 24 ફૂટની ભયજનક સપાટી વટાવી દીધી છે. નદીમાં પાણી 4.5 ફૂટ ઉપરથી વહી રહ્યું છે ફુરજા રોડ, ચારરસ્તા નજીક પાણી આવવાની શરૂઆત થઈ ગઈ છે.
ડાંગ - જિલ્લામાં સાર્વત્રિક વરસાદ
વહેલી સવારથી ડાંગમાં વરસાદ પડી રહ્યો છે જિલ્લાની પૂર્ણા,અંબિકા,ખાપરી નદીમાં પૂર ની સ્થિતિ નિર્માણ થઈ છે. છેલ્લા 12 કલાકમાં આહવા : 4.5 ઇંચ, વઘઇ :4 ઇંચ, સુબિર :3.80 ઇંચ, સાપુતારા : 4 ઇંચ વરસાદ નોંધાયો છે.
રાજકોટ શહેરમાં 70 વર્ષ જૂનો વરસાદનો રેકોર્ડ તૂટ્યો
સીઝનનો સૌથી વધુ વરસાદનો રેકોર્ડ તૂટ્યો છે. 86 દિવસમાં 57 ઇંચ વરસાદ ખાબક્યો છે. હજુ પણ હવામાન વિભાગની વરસાદની આગાહી છે. 1949 થી અત્યાર સુધીમાં 55 ઈંચ વરસાદ નોંધાયો હતો અને 2010માં 55 ઇંચ વરસાદ નોંધાયો હતો.