શિક્ષણાધિકારીએ શાળા સામે કરી લાલ આંખ

વડોદરામાં આવેલી જીવનભારતી વિદ્યાલયના વિદ્યાર્થીઓને એલ. સી. પકડાવી દેવાના મામલે જિલ્લા શિક્ષણાધિકારીએ શાળાને નોટીસ ફટકારી છે. અને શાળાની ગ્રાંટ શા માટે ન કાપવી તે બાબતે જવાબ માંગ્યો છે. જિલ્લા શિક્ષણ કચેરીના આદેશ છતાં 6 જેટલા વિદ્યાર્થીઓને ધોરણ 9માં પ્રવેશ ન અપાતા શિક્ષણાધિકારીએ શાળા સામે લાલ આંખ કરી છે.  

વડોદરા શહેરના કારેલીબાગ વિસ્તારમાં આવેલી જીવનભારતી વિદ્યાલય દ્વારા વિદ્યાર્થીઓને એલ સી આપી દેવાના મામલે હવે વિવાદ સર્જાયો છે. ગત 13 જુને જીવનભારતી વિદ્યાલય દ્વારા 37 જેટલા વિદ્યાર્થીઓને ધોરણ આઠ પાસ કર્યા બાદ ધોરણ 9માં પ્રવેશ આપવાને બદલે એલસી પકડાવી દીધા હતા.આ મામલે વિદ્યાર્થીઓ અને વાલીઓએ જિલ્લા શિક્ષણાધિકારીને ફરિયાદ કરીને પ્રવેશ આપવા માટે રજૂઆત કરી હતી.બાદમાં શિક્ષણાધિકારીએ છ વિદ્યાર્થીઓને પ્રવેશ આપવા માટે આદેશ કર્યો હતો. જો કે શાળા સંચાલકો જિલ્લા શિક્ષણાઅધિકારીના આ આદેશને ધોળીને પી ગયા છે.જેથી શિક્ષણાધિકારીએ જિવનભારતી વિદ્યાલયને નોટીસ ફટકારી છે અને શાળાની ગ્રાંટ શા માટે ન કાપવી તે બાબતે જવાબ માંગ્યો છે.આ મામલે જીવનભારતી વિદ્યાલયના ટ્રસ્ટીએ નોટીસમાં ગ્રાન્ટ કાંપ શબ્દ અતિશયોક્તી ભરેલો હોવાની વાત કરી હતી અને આ મુદ્દે સંચાલક મંડળને રજુઆત કરવાની વાત કરી છે.

સરકારી ગ્રાન્ટેડ શાળા હોવાના કારણે વિદ્યાર્થીઓને પ્રવેશ આપવો ફરજીયાત બને છે.જો કે શાળા સંચાલકોનું માનીએ તો છ માંથી ચાર વિદ્યાર્થીઓને પ્રવેશ અપાયો હતો.તેમ છતા વિદ્યાર્થીઓએ સમયસર પ્રવેશ ફી ન ભરતા તેમનો પ્રવેશ રદ્દ થયો છે.ત્યારે હવે જિલ્લા શિક્ષણાધિકારીની નોટીસ બાદ શાળા સંચાલકો શું નિર્ણય લે છે તે મહત્વનો રહેશે.