નવી દિલ્હી: દુનિયામાં સૌથી વધારે ઇન્ટરનેટ યૂઝર્સની બાબતે ભારત ભલે અમેરિકાને પછાડીને ગત વર્ષે ચીન બાદ બીજા સ્થાન પર આવી ગયું હોય પરંતુ જ્યારે ઇન્ટરનેટ સ્પીડની વાત આવે છે તો હજુ પણ ઘણા એશિયાઇ દેશોથી પાછળ છે. જો કે આ સ્થિતિ આગળના 18 મહિનામાં બદલાઇ જવાની છે કારણ કે ભારતીય અંતરીક્ષ અનુસંધાન સંગઠન આવનારા દિવસોમાં ત્રણ સંચાર ઉપગ્રહ અંતરીક્ષમાં મોકલવાની તૈયારી કરી રહ્યું છે. જેનો હેતુ ભારતમાં જ હાઇ સ્પીડ ઇન્ટરનેટ યુગની શરૂઆત કરવાનો છે.
સૂત્રો દ્વારા પ્રાપ્ત થતી વિગતો અનુસાર ISRO ના અધ્યક્ષ કિરણ કુમારે જણાવ્યું કે ત્રણ સંચાર ઉપગ્રહ લોન્ચ કરવા જઇ રહ્યા છીએ. જૂનમાં GSAT-19 નું લોન્ચિંગ થવાનું છે ત્યાર બાદ GSAT-11 અને પછી GSAT-20ને અંતરીક્ષમાં મોકલવામાં આવશે. GSAT-19 ને ISROની આગળની પેઢીના પ્રક્ષેપણ યાન GSLVMk III થી પ્રક્ષેપિત કરવામાં આવશે.
તેમણે જણાવ્યું હતું કે આ ઉપગ્રહ મલ્ટિપલ સ્પોટ બીમ (હાઈ ફ્રિકવન્સી પર કાર્યશીલ ખાસ પ્રકારનું ટ્રાન્સપોન્ડર) પર કામગીરી બજાવશે. તેનાથી ઈન્ટરનેટ સ્પીડ અને ક્નેક્ટિવિટીમાં વધારો થશે. સ્પોટ બીમ સેટેલાઈટ સિગ્નલ હોય છે તેનો ઉપયોગ પૃથ્વી પરના મર્યાદીત વિસ્તારને આવરી લેવા માટે કરાય છે. આ બિમ જેટલા સંકુચિત હશે તેટલા વધારે શક્તિશાળી હોય છે.
ઈન્ટરનેટ એન્ડ મોબાઈલ એસોશિયેશન ઓફ ઈન્ડિયાના અહેવાલ મુજબ જૂન સુધીમાં દેશમાં ઈન્ટરનેટ યુઝર્સની સંખ્યા 45થી 46.5 કરોડ સુધી પહોંચી જવાની ધારણા છે. જોકે અમેરિકાની એક ક્લાઉટ સર્વિસ પ્રોવાઈડર કંપનીના અહેવાલમાં જણાવ્યું હતું કે ફક્ત 4.1 એમબીપીએસની સરેરાશ કનેકશન સ્પીડ સાથે ભારતને ઝડપી ઈન્ટરનેટ કનેકશન સ્પીડની યાદીમાં 105મું સ્થાન મળ્યું છે. ત્રણ ઉપગ્રહ દેશમાં ગેમ ચેન્જર પુરવાર થશે.