આજે મુંબઈ ઈન્ડિયન્સ અને કોલકાતા નાઈટ રાઈડર્સ વચ્ચે મુકાબલો

આઇપીએલની દસમી સિઝનમાં આજે મુંબઈ ઈન્ડિયન્સ અને કોલકાતા નાઈટ રાઈડર્સ વચ્ચે કોલકાતાના ઈડન ગાર્ડન્સ ખાતે મુકાબલો ખેલાશે. મુંબઈ નોકઆઉટમાં નિશ્ચિત થઈ ચૂકયું છે. જ્યારે કોલકાતા આ મેચ જીતીને પોઈન્ટ ટેબલમાં ટોચના બે સ્થાનમાં ટકી રહેવાનો પ્રયાસ કરશે.  

પ્લે ઓફ ફોર્મેટને કારણે ટોચના બે સ્થાન મેળવનારી ટીમોને ફાઈનલમાં પ્રવેશવાની એકથી વધુ તક મળવાની છે જેના કારણે કોલકાતા માટે આજની મેચ મહત્વની બની રહેશે.મુંબઈ ઈન્ડિયન્સની ટીમને આજે મેચની હારને કારણે પણ કોઈ ફરક પડે તેમ નથી. આજે રાત્રે 8.00 વાગ્યાથી મેચનો પ્રારંભ થશે.  

બીજીબાજુ IPL-10ની 52મી મેચમાં દિલ્હી ડેરડેવિલ્સે રાઇઝિંગ પૂણે સુપરજાયન્ટને 7 રને હરાવ્યું. દિલ્હીના 169 રનના પડકારનો પીછો કરતા પૂણે 20 ઓવરમાં 7 વિકેટે 161 રન જ બનાવી શકી હતી. પૂણે તરફથી મનોજ તિવારીએ 60 રન બનાવ્યા હતા. 

તો  આ મુકાબલામાં દિલ્હી તરફથી ઝહિર ખાન અને મોહમ્મદ શમીએ 2-2 વિકેટ ઝડપી હતી. પૂણેની પ્લે ઓફમાં પહોચવાની આશા હજુ જીવંત છે. પૂણેએ રવિવારે કિંગ્સ ઇલેવન પંજાબ વિરૂદ્ધ રમવાનું છે અને આ મેચમાં જે ટીમ જીતશે તે પ્લે ઓફમાં પહોચશે. આ પહેલા શનિવારે રમાનાર હૈદરાબાદ અને ગુજરાત લાયન્સની મેચ પર નજર રાખવી પડશે.