અમેરિકન સંસદમાં ઓબામાકેરની જગ્યાએ હેલ્થકેરનું બિલ પાસ

અમેરિકન સંસદમાં ઓબામાકેરની જગ્યાએ હેલ્થકેરનું બિલ પાસ થયુ. અમેરિકાના માજી રાષ્ટ્રપતિ બરાક ઓબામાની મહત્વપૂર્ણ યોજનાઓમાંથી એક ઓબામાકેરને ટ્રમ્પે હેલ્થકેર બિલ તરીકે પાસ કરાવ્યુ હતુ. ગુરૂવારે હાઉસ ઓફ રિપ્રેઝેન્ટેટિવમાં નવું હેલ્થકેર બિલ પાસ થઈ ગયું છે. આ પહેલા માર્ચમાં પૂરતું સમર્થન ન મળવાના કારણે બિલ પાસ થઈ શકયું નહોતું. છેલ્લા ત્રણ મહિનાથી વધુ સમયના કાર્યકાળમાં ટ્રમ્પની આ પ્રથમ મોટી જીત છે.  

બિલ પાસ થયા બાદ અમેરિકન રાષ્ટ્રપતિ ડોનાલ્ડ ટ્રમ્પે કહ્યું કે  2 વર્ષ સુધી આ માટે અભિયાન ચલાવ્યું. હું જ્યાં પણ ગયો ત્યાં મેં ઓબામાકેરની લોકો પર થયેલી ખરાબ અસર જોઈ. તેમણે કહ્યું કે વીમા માટે પ્રીમિયમ ઘટવાનું ચાલુ થઇ જશે. આ વખતે બિલ પાસ થવામાં પૂરો ભરોસો હતો. હવે  અમે તેને સેનેટમાં પાસ કરાવીશું તેવો મને પૂરો વિશ્વાસ છે. ટ્રમ્પે કાર્યભાર સંભાળતા જ ઓબામાકેરને રદ કરવાનો આદેશ આપ્યો હતો.