હાઇકોર્ટના આદેશ મુજબ ગઇકાલે હાર્દિક પટેલ સુરતમાં હાજર થયો અને આજે રાજકોટની પડધરી કોર્ટમાં રાષ્ટ્રધ્વજનું અપમાન કરવાના મુદ્દે કોર્ટમાં હાજર કરવામાં આવ્યો હતો. જ્યાં તેમણે સરકાર પર પ્રહાર કર્યા હતાં અને અનેક નિવેદન આપ્યા હતાં. આ સાથે હાર્દિક પટેલ વિરૂદ્ધ નવો પક્ષ પણ ઉભો થયો હોવાનું પણ સામે આવ્યું છે.
હાર્દિક પટેલ સામે એટલા કેસ ચાલે છે કે તેને અઠવાડિયામાં 2 વખત તો કોર્ટમાં હાજર થવું પડે છે. ગઇકાલે સુરતની ક્રાઇમ બ્રાન્ચ પર તે હાજર થયો અને આજે પડધરી કોર્ટમાં તે હાજર થયો. કોર્ટનાં આદેશ પ્રમાણે હાર્દિક પટેલ સવારે કોર્ટમાં હાજર થઇ ગયો હતો. પરંતુ કોર્ટમાં હાજર રહેલા હાર્દિકની કોર્ટમાં નવી તારીખ પડી હતી અને હવે હાર્દિકને કોર્ટના આદેશ પ્રમાણે આગામી 7 તારીખે કોર્ટમાં હાજર થવું પડશે તો હાર્દિક પટેલે અહીં જણાવ્યું હતું કે રાજકોટમાંથી બોમ્બ મળવો એ નલિયાકાંડના મુદ્દાને ડાયવર્ટ કરવાની શંકા ઉપજાવે છે અને આ સિવાય અમારો જે વિરોધ થઇ રહ્યો છે તેની સામે અમને કોઇ વાંધો નથી. આ સાથે જ હાર્દિક પટેલે સરકાર પર નિશાન સાધ્યુ હતું.
હાર્દિક પટેલ પડધરી કોર્ટમાં રજુ થયો ત્યારે દરેક જિલ્લાના પાટીદારો અહીં ઉમટી પડયાં હતાં. જય સરદાર જય પાટીદારના નારા લગાવ્યા હતા. તો બીજી તરફ પાસ કન્વીનર હાર્દિક પટેલ વિરૂદ્ધ નવો પક્ષ ઉભો કરવામાં આવશે તેવું પણ સામે આવ્યું છે. અને આ પક્ષ કેતન પટેલ દ્વારા પાટીદાર સમાજનો નવો પક્ષ બનાવવામાં આવ્યો છે અને ટુંક સમયમાં જ આ પક્ષના સંગઠનની રચના કરવામાં આવશે. આ પક્ષનું નામ બિન રાજકીય પાટીદાર અનામત આંદોલન રાખવામાં આવશે. ત્યારે હવે પાટીદાર અનામત આંદોલનમાં આગામી સમયમાં શું વળાંક આવે છે અને હાર્દિક પટેલની આગામી રણનીતી શું હશે તે તો આવનાર સમય જ બતાવશે.