સોશિયલ મીડિયામાં 25 ફેબ્રુઆરીથી એક વીડિયો ખુબજ વાયરલ થયો છે. વાયરલ થઈ રહેલા આ વીડિયોમાં એક ગાયો ચરાવતા માલધારીની સામે સાવજ આવી ચડે છે અને ત્યારે જ માલધારી તેની પાછળ દોડે છે. આમ સામેથી માલધારીને જોતા જ સાવજ ત્યાંથી ભાગી જાય છે. જંગલના રાજાને આ રીતે માલધારીથી ડરીને ભાગતા જોઈને પહેલા તો કોઈને વિશ્વાસ થયો ન હતો. તેમજ એવી પણ ચર્ચા થઈ હતી કે આ સાવજ ક્યાંક એનિમેશનની કમાલ તો નથીને! કારણ કે સાવજ માણસને જોઈને કેવી રીતે ભાગી શકે? આ સાવજ હુમલો કરી શક્યો હોત. આ સાવજ ગાયોનું મારણ કરી શક્યો હોત. તેમજ આ માલધારીનો જીવ પણ લઈ શક્યો હોત. પરંતુ આમાંથી કંઈ પણ ન થયું. અને સોશિયલ મીડિયામાં આ વીડિયો વાયરલ થઈ ગયો.