જલસા...! ગુજરાતના પાંચ મંત્રીઓ માટે નવી ઈનોવા કાર ખરીદવામાં આવી

એકતરફ નોટબંધના નિર્ણય સામે લોકો લાંબી કતારોમાં ઉભા રહીને રૂપિયા મેળવી રહ્યા છે. ઘણા પરિવારોમાં લગ્ન કેવી રીતે થશે તેની ચિંતા છે. તો બીજીબાજુ રાજય સરકારના વાહન-વ્યવહાર વિભાગ દ્વારા નાયબ મુખ્યમંત્રી નિતિન પટેલ અને વિધાનસભાના અધ્યક્ષ રમણલાલ વોરા સહિતના પાંચ મંત્રીઓ માટે નવી ઇનોવા ગાડીની ખરીદી કરવામાં આવી છે. ત્યારે આ ગાડીમાં મંત્રીઓ કંકુ અને ચોખા લગાવીને માર્ગો પર ફરતા પણ થઇ ગયા છે.

સચિવાલયના સુત્રોના જણાવ્યા પ્રમાણે આ 5 નવી ઇનોવા ગાડીમાં નાયબ મુખ્યમંત્રી નિતિન પટેલ ગુજરાત વિધાનસભાના અધ્યક્ષ રમણલાલ વોરા કેબિનેટ મંત્રી ભુપેદ્રસિંહ ચુડાસમા જયેશ રાદડીયા અને ગણપત વસાવાને ફાળવવામાં આવી છે. 

પ્રથમ તબક્કે 2 લાખ કિલોમીટરથી વધારે ફરેલી આ ચાર મંત્રી અને વિધાનસભાના અધ્યક્ષની ગાડી બદલવામાં આવી છે. હવે પછી બીજા તબક્કામાં અન્ય મંત્રીઓની ગાડી બદલવાની દિશામાં રાજય સરકાર વિચારણા કરશે તેવું જાણવા મળે છે.