ગઈ કાલની રાતે રાજકોટના એસ.ટી. બસ સ્ટેશનમાં એક અનોખો નજારો જોવા મળ્યો હતો. જેમાં રાતે 11 વાગ્યાની આસપાસ બસસ્ટેન્ડની કેન્ટીન પાસે એક પરપ્રાંતીય મહિલા પ્રસૂતીની પીડાથી કણસતી હતી અને ત્યારબાદ બેભાન થઈ ગઈ હતી. જોકે ઘટનાની જાણ થતા બસસ્ટેન્ડની મહિલા કંડક્ટરો મહિલાની વહારે દોડી આવી હતી. તેમણે ચાદરની આડશમાં પ્રસૂતિ કરાવી હતી. મહિલાને પુત્રનો જન્મ થતાં સર્વત્ર ખૂશી વ્યાપી ગઈ હતી.
પ્રાપ્ત થતી માહિતી પ્રમાણે રાજકોટના એસ.ટી સ્ટેન્ડ પર એક પરપ્રાંતિય મહિલાને પ્રસૂતિની પીડા ઉપડી હોવાની માહિતી મુસાફરો એટીઆઈ મુકેશસિંહ જાડેજાને આપી હતી. જેથી તેઓ કેન્ટિન પાસે દોડી આવ્યા હતા અને આ પછી તેમણે મહિલા કંડક્ટરોને બોલાવી હતી. જેથી તેમણે ચાદરની આડશ ઊભી કરીને મહિલાને પ્રસૂતિ કરાવી હતી. તેમની મદદે 108ના કર્મચારીઓ પણ જોડાયા હતા. ગર્ભવતી મહિલાને પ્રસૂતિની પીડા ઉપડતાં ફરજ પર હાજર પાંચ મહિલા કંડકટરો તેમની મદદે આવ્યા હતા. કારણ કે મહિલાને હોસ્પિટલે ખસેડી શકાય એટલો સમય નહોતો. આથી પ્લેટફોર્મ પર ડિલેવરી કરાવવાનો નિર્ણય લેવાયો હતો. લગભગ પંદરેક મિનિટની મહેનત પછી પુત્રનો જન્મ થયો હતો.
મહિલાની સફળ પ્રસુતિ બાદ તેને અને નવજાત બાળકને જનાના હોસ્પિટલ ખાતે ખસેડવામાં આવી હતી. જે પછી મહિલાના પરિવારજનો હોસ્પિટલ પહોંચ્યા બાદ મહિલા કંડકટરો પરત આવી ગઈ હતી.