ફેસબુક પર યુવતી સાથેની ફ્રેન્ડશીપ બેન્કના નિવૃત્ત અધિકારીને પડી ભારે લાગ્

ઘાટલોડીયામાં રહેતા 68 વર્ષના નિવૃત બેન્ક મેનેજરને ફેસબુક પર યુવતી સાથે ફ્રેન્ડશીપ કરવાનું ભારે પડયું હતું. જેમાં યુવતીએ ભારતમાં મળતી હર્બલ દવાની વિદેશમાં ભારે માંગ છે અને સારૃ વળતર મળશે કહીને પોતાના ખાતામાં રૂ 4 50 000 ભરાવીને છેતરપિંડી કરી હતી. આ અંગે ઘાટલોડિયા પોલીસે ગુનો નોંધીને વધુ તપાસ હાથ ધરી છે. 

ઘટના મુજબ ઘાટલોડિયામાં મેમનગર સ્થિત સર્જન ટાવરમાં રહેતા અને બેન્કના નિવૃત ચીફ મેનેજર સતીષકુમાર માલકેશ્વરદાસ ધવનને તા. 30-07-16નાં રોજ ફેસબુક એકાઉન્ટ પર જનીતા મોરીસન નામના ફેસબુક એકાઉન્ટમાંથી ફ્રેન્ડશીપ રિકવેસ્ટ આવતા તેમણે રિકવેસ્ટ સ્વીકારી કરી હતી. બાદમાં બન્ને ફેસબુક અને ઈ-મેઇલના માધ્યમથી એકબીજાના સંપર્કમાં રહેવા લાગ્યા હતા.

જનીતાએ તે મુંબઈની વતની હોવાનું અને હાલ લંડનમાં સ્થાયી થઈ હોવાનું ધવનને જણાવ્યું હતું. બાદમાં જનીતાએ ભારતમાં ખરીદી કરવા આવવાની હોવાથી ધવનને હોટેલ બુક કરાવવા કહ્યું હતું. મની ટ્રાન્સફર થતા ન હોવાથી જનીતીના કહેવાથી ધવને 16 ૦૦૦ રૂ. તેના ખાતામાં જમા કરાવ્યા હતા. ત્યારબાદ જનીતાએ ધવનને કહ્યું હતું કે ભારતમાં એક હર્બલ મેડિસીન એક્રેામાઈઝન ફૂડ નામની હર્બલ જડીબુટ્ટી મળે છે તે દવાની વિદેશમાં બહુ મોટી માંગ છે. દવાના વેચાણમાંથી જે નફો થશે તેના 40 ટકા તમને અને 60 ટકા હું રાખીશ એમ તેણે ધવનને કહ્યું હતું. જનીતાએ આ જડીબુટ્ટી ક્યાં મળશે તે માટે વેબસાઈટ અને ફોન નંબર આપી તપાસ કરવા કહ્યું હતું. ધવને કંપનીમાં તપાસ કરતા શ્રધ્ધા મહેતાએ ફોન ઊપાડયો હતો. તેમણે એક્રોમાઈઝન ફૂડ નામની જડીબુટ્ટી અંગે પુછતા શ્રધ્ધાએ ૧.૫ કિગ્રા.ના પેકેટના રૂ. 2 56 000 તથા ૫ કિગ્રાના પેકેટના રૂ. 8 75 000 કિંમત હોવાનું કહ્યું હતું. જોકે ધવને તે સમયે પોતાની પાસે પૈસા ન હોવાનું જણાવતા જનીતાએ પોતે 1.5 કિગ્રા માટે રૂ. 1 50 000 જમા કરાવી દીધા હોવાનું તથા પૈસા ભર્યાની રિસીપ્ટ પણ ધવનને ઈમેલ કરી હતી.

આથી ધવનને વિશ્વાસ આવ્યો હતો. જે પછી ધવને બાકીના રૂ. 1 15 000 કંપનીમાં ભરી દીધા હતા. આ પ્રકારે જડીબુટ્ટી ખરીદવાને બહાને જનીતા અને તેના પિતા ક્રિસ્ટોફ મોરીસને ધવન પાસે કુલ રૂ. 4 5૦ ૦૦૦ ભરાવ્યા હતા. જોકે બાદમાં જનીતાએ ઈમેલનો જવાબ આપવાનું તથા ફોન ઉપાડવાનું બંધ કરી દેતા ધવનને શંકા ગઈ હતી. ધવને તેમના પુત્ર મારફતે તપાસ કરાવતા આવી કોઈ કંપની ન હોવાનું બહાર આવ્યું હતું. આથી ધવને જનીતા મોરીસન તેના પિતા ક્રિસ્ટોફ અને શ્રધ્ધા મહેતા સામે ઘાટલોડીયા પોલીસ સ્ટેશનમાં ફરિયાદ નોંધાવી હતી.