જી-20 સંમેલનમાં સામેલ થવા માટે ચીનના શહેર હાંગજાઉ શનિવારે પહોંચેલા અમેરિકાના રાષ્ટ્રપ્રમુખ બરાક ઓબામા અને તેમના દળને અસહજ સ્થિતિનો સામનો કરવો પડ્યો હતો. ઓબામનું વિમાન લેન્ડ થયું ત્યારે એક ચીની અધિકારી અમેરિકાના અધિકારીઓ પર વરસ્યા હતા. ચીની અધિકારીએ તેમને કહ્યું કે આ અમારો દેશ અને એરપોર્ટ છે. અમેરિકાના રાષ્ટ્રીય સુરક્ષા સલાહકાર સુસેન રાઇસ અને વ્હાઇટ હાઉસના પત્રકારોને પણ તપાસમાંથી છૂટ આપવામાં આવી ન હતી.
સામાન્ય રીતે ઓબામાની સાથે યાત્રા પર જનાર પત્રકાર વિમાનમાંથી ઉતર્યા બાદ બોઇંગ 747ના વિંગની નીચે ઉભા રહે છે. જેથી તેઓ રાષ્ટ્રપ્રમુખના વિમાનમાંથી બહાર નીકળવાની તસવીરો લઇ શકે. પરંતુ હાંગજાઉમાં ઓબામાના વિમાનમાંથી નીચે ઉતર્યા બાદ ચીની સુરક્ષા અધિકારીઓએ એક બ્લ્યુ દોરડું લગાવી દીધું અને પત્રકારોને તેમની પાછળ ધકેલી દીધા.
જો કે ચીની અધિકારીઓ આટલેથી ન અટકયા અને તેમાંથી એક વ્હાઇટ હાઉસના અધિકારીઓ પર ગુસ્સે થવા લાગ્યો હતો. તે પત્રકારોને ત્યાંથી જવા માટે કહેવા લાગ્યો. ત્યારે વ્હાઇટ હાઉસની એક મહિલા અધિકારીએ હ્યું કે આ અમેરિકી રાષ્ટ્રપ્રમુખનું વિમાન છે. જેના જવાબમાં ચીની અધિકારીએ અંગ્રેજીમાં કહ્યું કે આ અમારો દેશ છે. આ અમારું એરપોર્ટ છે.