વિદેશી આતંકવાદી સંગઠનની યાદીમાં જમાત-ઉદ-દાવાનું નામ

મુંબઈ હુમલાના માસ્ટર માઈન્ડ હાફિઝ સઈદના સંગઠન જમાત ઉદ દાવાને અમેરિકાએ આતંકવાદી સંગઠન જાહેર કર્યુ છે. અત્યાર સુધી પાકિસ્તાન હાફિ{ સઈદને આતંકવાદી માનવા તૈયાર ન હતું. ભારતે અસંખ્ય પુરાવા આપ્યા છતા પાકિસ્તાને હાફિઝ સઈદ સામે કોઈ કાર્યવાહી ન કરી. હવે અમેરિકાએ હાફિઝ સઈદના સંગઠનને આતંકવાદી સંગઠન જાહેર કર્યુ છે ત્યારે શું પાકિસ્તાન માનશે ખરું કે હા હાફિઝ સઈદ આતંકવાદી છે.

આતંકવાદ સામેની લડાઈમાં ભારતને સૌથી મોટી સફળતા મળી છે. અમેરિકાએ હાફિઝ સઈદના સંગઠન જમાત ઉદ દાવાને આતંકવાદી સંગઠન જાહેર કર્યુ છે. એટલે કે હાફિઝ સઈદને અમેરિકાએ પણ આતંકવાદી માની લીધો છે. આ એ જ હાફિઝ સઈદ છે કે જે 2008માં મુંબઈમાં હોટલ તાજ સહિત અન્ય સ્થળોએ થયેલા આતંકવાદી હુમલા પાછળનો માસ્ટર માઈન્ડ હતો. અજમલ કસાબને હાફિ{ સઈદે જ તૈયાર કરીને ભારત મોકલ્યો હતો.ભારત વર્ષોથી પાકિસ્તાનને હાફિઝ સઈદ વિશે અનેક પુરાવા આપી ચુક્યું છે. અને એવી માગ પણ કરી ચુક્યું છે કે હાફિઝ સઈદની ધરપકડ કરી જમાત ઉદ દાવા સંગઠન પર પ્રતિબંધ લગાવો. પરંતુ પાકિસ્તાને આજ દિન સુધી હાફિઝ સઈદ સામે કોઈ કાર્યવાહી કરી નથી.આજે પણ હાફિઝ સઈદ પાકિસ્તાનમાં ખુલ્લેઆમ ફરે છે. અને ભારત વિરોધી નિવેદનો આપ્યા કરે છે. અત્યાર સુધી પાકિસ્તાન એવું કહેતું હતું કે મુંબઈ હુમલા પાછળ હાફિઝ સઈદનો કોઈ હાથ નથી અને તે આતંકવાદી પણ નથી.પરંતુ હવે જગત જમાદાર અને પાકિસ્તાન જેના પૈસા પર લીલાલહેર કરે છે તે અમેરિકાએ જ હાફિઝ સઈદના સંગઠન જમાત ઉદ દાવાને આતંકવાદી સંગઠનોના લિસ્ટમાં મુકતા પાકિસ્તાનની બોલતી બંધ થઈ જશે.

અમેરિકાએ જમાત ઉદ દાવા ઉપરાંત લશ્કર એ તૈયબા સાથે સંકળાયેલા અલ અનફલ ટ્રસ્ટ તારીક એ હુમરત એ રસૂલ અને તારીક એ તહફુઝ કિબલા અવાલને પણ આતંકવાદી સંગઠનો જાહેર કર્યા છે. અમેરિકા 2001માં લશ્કર એ તૈયબાને આતંકવાદી સંગઠન જાહેર કરી ચુક્યું છે. ભારત માટે આ મોટા સમાચાર છે. કેમ કે હવે જ્યારે પણ ભારત સરકાર પાકિસ્તાન સાથે બેઠક કરશે ત્યારે હાફિઝ સઈદ સામે કાર્યવાહી માટે દબાણ કરી શકશે. અને તેવા સમયે પાકિસ્તાન પાસે ભારતની ફરિયાદનો કોઈ જવાબ નહિ હોય. વિડંબણા એ છે કે આવા સંવેદનશીલ મુદ્દાઓ પર પણ સત્તા ગુમાવનારાઓ રાજનીતિ કરવાનું ભૂલતા નથી. 

અમેરિકાએ ભલે હાફિઝ સઈદને આડકતરી રીતે આતંકવાદી જાહેર કર્યો હોય પરંતુ પાકિસ્તાન હજુય સઈદને બચાવવાનો પ્રયત્ન કરશે. ઉલટાનું ISIના કારણે પાકિસ્તાનની નવાઝ શરીફ સરકાર હાફિઝ સઈદ સામે કાર્યવાહીની હિંમત નહિ કરે.હા અમેરિકા ધારે તો સઈદને સીધો કરી શકે છે.