સ્કૂલ વધીવાન અને રિક્ષા ચાલકોની હડતાળ

વડોદરા શહેરના સ્કૂલ વધીવાન અને રિક્ષા ચાલકોની હડતાળને પગલે શહેરના વિદ્યાર્થીઓ અને વાલીઓને ખુબ હાલાકી ભોગવવી પડી છે. તો સામે પક્ષે સ્કૂલ વર્ધીવાન અને રિક્ષા ચાલકો હવે પોલીસ કમિશનરની તાનાશાહી સામે લડી લેવાના મૂડમાં છે. અને આગામી દિવસોમાં જો તેમની સામેનું જાહેરનામું પાછું નહિ ખેચવામાં આવે તો ભૂખ હડતાળ પર જવાની ચીમકી ઉચ્ચારી છે.  

વડોદરા શહેરના સ્કૂલ વર્ધીવાન અને રિક્ષા ચાલકો પોલીસ કમિશનરના જાહેરનામાના વિરોધમાં અચોક્કસ મુદ્દતની હડતાલ પર ઉતરી ગયા છે. વડોદરા પોલીસ કમિશ્રર સતીશ શર્માએ શાળા કોલેજોમાં જતા વાહનોનું ફરજિયાત રજીસ્ટ્રેશન કરવા અંગેનું જાહેરનામું ઘણાં સમય અગાઉ બહાર પાડયું હતું. અને હવે વડોદરા પોલીસ આ જાહેર નામાનો કડકાઈ પૂર્વક અમલ કરાવી રહ્યાં છે. જેને લઈને બે દિવસ પહેલા જ 40 જેટલા રિક્ષા ચાલકોની પોલીસ અટકાયત કરી હતી અને તેમના વાહનો પણ ડીટેઈન કર્યા હતા. ત્યારે હવે આ સમગ્ર મામલે વડોદરા શહેરના તમામ સ્કૂલ વર્ધીવાન અને રિક્ષા ચાલકો લડતના મુડમાં આવી ગયા છે. અને કોઈ પણ ભોગે પોલીસ તેમની સમસ્યા સમજે તેવી માંગ કરી રહ્યા છે. સાથે સાથે જો આ જાહેરનામું પાછું નહિ ખેચવામાં આવે તો આગામી સમયમાં ભૂખ હડતાળ પર જવાની ચીમકી પણ ઉચ્ચારવામાં આવી છે.  

વડોદરા પોલીસ કમિશનરથી ખફા એવા સ્કૂલ વર્ધીવાન અને રિક્ષા ચાલકોએ વડોદરાના ન્યાય મંદિરની બહાર દેખાવો યોજ્યા હતા. અને રેલી કાઢીને વડોદરા પોલીસ કમિશનરને આવેદન પત્ર પણ આપી તેમની સમસ્યાનો ઉકેલ લાવવાની માંગ કરી હતી. તો સ્કૂલ વર્ધીવાન-રિક્ષા ચાલકોની મડાગાંઠને કારણે વાલીઓ અને વિદ્યાર્થીને સહન કરવાનો વારો આવ્યો છે. 

હડતાળને કારણે જે વિદ્યાર્થીઓની આજથી પરીક્ષા શરુ થઇ છે તેઓને ખુબ મુશ્કેલીનો સામનો કરવો પડ્યો હતો. અને વાલીઓએ પોતાનો આક્રોશ પણ વ્યક્ત કર્યો હતો. બે દિવસથી શરુ થયેલી આ હડતાળનો જલદી ઉકેલ આવે તેમ વાલીઓ ઈચ્છી રહ્યા છે.  ત્યારે હવે વડોદરા શહેર પોલીસ કમિશનર પણ આ મામલે સમાધાનનો માર્ગ અપનાવે તે જરૂરી છે.