કચ્છ નહી દેખા તો કુછ નહી દેખા..રાજ્ય સરકારની આ જાહેરાત અને બે વર્ષથી કચ્છની ભૂમિને વિશ્વફલક પર પહોચાડવાના પ્રયાસને ફટકો પડે તેવી સ્થિતિ સર્જાઈ છે. હાલમાં કચ્છ રણોત્સને માણવા આવી રહેલા પ્રવાસીઓને ભારે અસુવિધાનો અનુભવ થતા અકળાઈ ઉઠયા છે.
ગુજરાત સરકારના મહાઈવેન્ટ ગણાતા કચ્છ રણોત્સવ 2013ને માણવા માટે રાજ્ય સહિત દેશ-વિદેશમાંથી પ્રવાસીઓ ઉમટી રહ્યા છે. જેમાં ચાલુ વર્ષે સરકારી આયોજનને બદલે ખાનગી એજન્સીને ટેન્ટસીટીનું નિર્માણ અને મુસાફરોની સુવિધાઓ ઉભી કરવાનુ કામ સોંપાયુ છે. જો કે રણોત્સવના શરૂઆતના તબક્કામાં જ સુવિધાના અભાવને કારણે પ્રવાસીઓને કડવો અનુભવ થયો છે. મુસાફરો પાસેથી ફાઈવસ્ટાર પ્રવાસનો ખર્ચ વસૂલીને ખાનગી એજન્સી સુવિધા આપવામાં ઉણી ઉતરી રહી હોય તેવુ લાગી રહ્યુ છે. પ્રવાસીઓને પડી રહેલી મુશ્કેલીઓના કારણે પ્રવાસીઓ અકળાઈ ઉઠયા છે. સમયસર જમવાનુ નથી. અને જે જમવાનુ મળે છે તે પણ હલકી ગુણવત્તાનું મળે છે.પરંતુ રણોત્સવનું સંચાલન જે ખાનગી કંપનીને સોંપાયુ છે તે લલ્લુજી એન્ડ સન્સના સંચાલકો પોતાનો લૂવો બચાવ કરતા નજરે ચઢી રહ્યા છે.
પ્રવાસીઓની ફરીયાદો પ્રવાસન વિભાગના ધ્યાનમાં આવી છે. પ્રવાસન વિભાગે કોઈ ફરીયાદની તપાસ કરવામાં આવશે તેવી ખાતરી આપી છે. કચ્છની શાન બની ચૂકેલા અને આઠ અગાઉ માત્ર ત્રિદિવસીય ઉત્સવથી શરૂ થયેલા રણોત્સવને 90 દિવસનો એશિયાનો સૌથી મોટો એક જ સ્થળ પરના ટેન્ટસીટી તરીકેની નામના મેળવી છે. ત્યારે ખાનગી કંપનીને આ વખતે સોંપાયેલી સુવિધોની જવાબદારી ક્યાં કચ્છના રણની આભાને ઝાખી ને કરે તે જોવુ અનિવાર્ય બની ગયુ છે.