યજમાન ન્યૂઝીલેન્ડ અને વિન્ડીઝ વચ્ચે બે ટેસ્ટ મેચની શ્રેણી રમાઈ ગઈ. આ બંને ટેસ્ટમાં મહેમાન ટીમ વિન્ડીઝને કારમા પરાજયનો સામનો કરવો પડ્યો.
૧૭૪ રન ફટકારનાર હેનરી નિકોલ્સ મેન ઓફ ધ મેચ
જેમિસન મેન ઓફ ધ સિરીઝ
પ્રથમ ટેસ્ટ ઇનિંગ્સ અને ૧૩૪ રને હારનારી કેરેબિયન ટીમને બીજી ટેસ્ટમાં પણ ઇનિંગ્સથી હારનો સામનો કરવો પડ્યો. ન્યૂઝીલેન્ડે બીજી ટેસ્ટ મેચમાં વિન્ડીઝને ઇનિંગ્સ અને ૧૨ રનથી હરાવીને ૨-૦થી સૂપડાં સાફ કરી નાખ્યાં.
પ્રથમ ઇનિંગ્સમાં વિન્ડીઝની ટીમનો વાવટો ૧૩૧ રનમાં જ સમેટાઈ ગયો
વેલિંગ્ટનના બેસિન રિઝર્વ મેદાન પર રમાયેલી બે મેચની ટેસ્ટ શ્રેણીના અંતિમ મુકાબલાના ત્રીજા દિવસે ગઈ કાલે વિન્ડીઝે ન્યૂઝીલેન્ડની જીતને ટાળી દીધી હતી. ગઈ કાલની રમત પૂરી થઈ ત્યારે કેરેબિયન કેપ્ટન જેસન હોલ્ડર ૬૦ રન બનાવીને અણનમ રહ્યો હતો, પરંતુ આજે મેચના ચોથા દિવસે કેપ્ટન હોલ્ડર (૬૧ રન) ઇનિંગ્સના પરાજયને ટાળી શક્યો નહોતો. છ વિકેટે ૨૪૪ રનના સ્કોરથી આજે આગળ રમતા વિન્ડીઝની ટીમ ૩૧૭ રન બનાવીને ઓલઆઉટ થઈ ગઈ હતી. પ્રથમ ઇનિંગ્સમાં વિન્ડીઝની ટીમનો વાવટો ૧૩૧ રનમાં જ સમેટાઈ ગયો હતો.
યજમાન ટીમે બીજી ટેસ્ટ ઇનિંગ્સ અને ૧૨ રનના મોટા અંતરથી જીતી લીધી
ન્યૂઝીલેન્ડે પ્રથમ ઇનિંગ્સમાં ૪૬૦ રન બનાવ્યા હતા, જેના જવાબમાં બે ઇનિંગ્સમાં પણ વિન્ડીઝની ટીમ આટલા રન બનાવી શકી નહોતી. પ્રથમ ઇનિંગ્સમાં ૧૩૧ રન અને બીજી ઇનિંગ્સમાં ૩૧૭ રન બનાવીને કેરેબિયન ટીમે ૨૦ વિકેટ ગુમાવી દીધી હતી. આથી યજમાન ટીમે બીજી ટેસ્ટ ઇનિંગ્સ અને ૧૨ રનના મોટા અંતરથી જીતી લીધી હતી.
ટિમ સાઉથી અને કાઇલ જેમિસને પાંચ-પાંચ વિકેટ ઝડપી
પ્રથમ ઇનિંગ્સમાં ન્યૂઝીલેન્ડ તરફથી ટિમ સાઉથી અને કાઇલ જેમિસને પાંચ-પાંચ વિકેટ ઝડપી હતી, જ્યારે બીજી ઇનિંગ્સમાં ટ્રેન્ટ બોલ્ટ અને નીલ વેગ્નરે ત્રણ-ત્રણ વિકેટ અને ટિમ સાઉથી તેમજ જેમિસને ૨-૨ બે વિકેટ ઝડપી હતી.
ટોમ લાથમે ટોસ હાર્યા છતાં વિન્ડીઝને ફોલોઓન માટે મજબૂર કર્યું
કેન વિલિયમ્સનની ગેરહાજરીમાં પહેલી વાર ન્યૂઝીલેન્ડની કેપ્ટનશિપ સંભાળી રહેલા ટોમ લાથમે ટોસ હાર્યા છતાં વિન્ડીઝને ફોલોઓન માટે મજબૂર કર્યું હતું. કિવી ટીમે હેનરી નિકોલ્સના ૧૭૪ રનની દમદાર ઇનિંગ્સના દમ પર ૪૬૦ રન બનાવ્યા હતા. એ ઉપરાંત નીલ વેગ્નરે ૬૬ રનની અણનમ ઇનિંગ્સ રમી હતી. એક સમયે એવું લાગ્યું હતું કે વિલિયમ્સનની ઊણપ ટીમને ખટકશે, પરંતુ એવું બન્યું નહીં.