એક લેજન્ડરી વિદેશી ખેલાડીએ આઇપીએલની ફ્રેન્ચાઈઝી રાજસ્થાન રોયલ્સના માલિક અંગે ચોંકાવનારો ખુલાસો કર્યો છે. આ ખેલાડીએ હાલમાં જ પોતાના પુસ્તકમાં જણાવ્યું હતું.
ઈન્ડિયન પ્રીમિયર લીગનો વિવાદ સામે આવ્યો
એક લેજન્ડરી વિદેશી ખેલાડીએ કર્યો ખુલ્લાસો
રાજસ્થાન રોયલ્સના માલિકે ત્રણ-ચાર થપ્પડ મારી હતી
ઈન્ડિયન પ્રીમિયર લીગ (IPL)ના વિવાદો સાથે જૂનો સંબંધ છે, પરંતુ આ વખતે આઈપીએલ સાથે જોડાયેલી એક ઘટના સામે આવી છે જેને જાણીને તમે પણ ચોંકી જશો. આ વખતે એક લેજન્ડરી વિદેશી ખેલાડીએ આઇપીએલની ફ્રેન્ચાઈઝી રાજસ્થાન રોયલ્સના માલિક અંગે ચોંકાવનારો ખુલાસો કર્યો છે. આ ખેલાડીએ હાલમાં જ પોતાના પુસ્તકમાં જણાવ્યું છે કે, રાજસ્થાન રોયલ્સના માલિકે મેચ દરમિયાન તેને ત્રણ-ચાર થપ્પડ મારી હતી.
આ ખેલાડીએ કર્યો મોટો ખુલાસો
ન્યૂઝીલેન્ડ ક્રિકેટ ટીમના ખતરનાક ખેલાડી રહેલા રોસ ટેલરે રાજસ્થાન રોયલ્સના માલિકે થપ્પડ મારવાની એક મોટી ઘટનાનો ખુલાસો કર્યો છે. તેમના આ નિવેદનથી સનસની મચી ગઈ છે. રોસ ટેલરે પોતાના પુસ્તકમાં જણાવ્યું છે કે, "2011માં રાજસ્થાને મોહાલીમાં કિંગ્સ ઇલેવન પંજાબ સાથે મેચ રમી હતી. મેચ દરમિયાન તે શૂન્ય પર આઉટ થયો હતો. આના પર રાજસ્થાન રોયલ્સના માલિકે મને ત્રણ-ચાર થપ્પડ મારી હતી. તેમ છતાં તેણે મજાકમાં કર્યું હતું. તેણે મને કહ્યું કે અમે તમને શૂન્ય પર આઉટ થવા માટે એક મિલિયન ડોલર આપતા નથી. આટલું કર્યા બાદ તે હસવા લાગ્યો. પરંતુ આઈપીએલ જેવા પ્લેટફોર્મ પર, તમે એવી અપેક્ષા રાખતા નથી. "
આઈપીએલમાં 50થી વધુ મેચ રમાઈ
રોસ ટેલર ઈન્ડિયન પ્રીમિયર લીગમાં ઘણી ટીમોનો ભાગ રહી ચૂક્યા છે. આઈપીએલમાં રોસ ટેલર કુલ 55 મેચ રમ્યો છે. જેમાં તેણે 25.43ની એવરેજથી 1017 રન બનાવ્યા છે. ઈન્ડિયન પ્રીમિયર લીગમાં તેના બેટમાંથી કુલ 3 અડધી સદી લાગી છે. રોસ ટેલરે આ વર્ષે ક્રિકેટમાંથી સંન્યાસ લઈ લીધો છે.
ન્યુઝીલેન્ડના સૌથી સફળ ખેલાડીઓમાંથી એક
રોસ ટેલરે 2006માં ન્યૂઝીલેન્ડ માટે પોતાની પ્રથમ વન ડે રમી હતી. તે પછીના વર્ષે, તેણે તેની પ્રથમ ટેસ્ટ રમી. રોસ ટેલરે 112 ટેસ્ટમાં 19 સદીની મદદથી 7,683 રન બનાવ્યા હતા. ટેલરે 236 વન ડેમાં 8,593 રન અને 102 ટી-20 ઈન્ટરનેશનલમાં 1,909 રન ફટકાર્યા હતા. ટેલર દુનિયાનો એકમાત્ર એવો ખેલાડી છે કે, જેણે ત્રણેય ફોર્મેટમાં 100થી વધુ આંતરરાષ્ટ્રીય મેચો રમી હોય. તેણે પોતાની અંતિમ મેચ આ વર્ષે એપ્રિલમાં નેધરલેન્ડ સામે રમી હતી. રોસ ટેલરની મેચ ન્યૂઝીલેન્ડ માટે તેની 450મી અને છેલ્લી મેચ હતી.