ભોપાલ / લગ્નમાં કાર્ડના બદલે છોડ વાવેલાં ૪૦૦ કુંડાં મોકલીને આમંત્રણ આપ્યું

• લગ્નમાં આવ્યો નવો ટ્રેન્ડ
• કુંડાનો કંકોતરી તરીકે કરાયો ઉપયોગ
• આઠ મહિનાથી તૈયાર કરાઈ રહ્યા હતા કુંડા

ભોપાલના તુલસીનગરમાં રહેતા રાજકુમાર કનકનેના પુત્ર પ્રાંશુનાં ૨૦ નવેમ્બરે લગ્ન હતાં. પહેલાં પરિવારે વિચાર્યું કે લગ્નનાં કાર્ડ વહેંચીશું, પરંતુ મોટા પુત્ર પ્રતીકે કહ્યું કે આપણે કંઇક અલગ કરીએ, જેથી લોકો પર્યાવરણ પ્રત્યે જાગૃત થાય. પરિવારે નિર્ણય લીધો કે આઠ મહિનાના છોડ લાગેલાં કુંડાં પર વર-વધૂનાં નામ અને કાર્યક્રમ સ્થળનું નામ છપાવીને લોકોને આમંત્રિત કરવામાં આવે. ઘરના દરેક સભ્ય આ માટે તૈયાર થયા. પરિવારના લોકોએ એમ પણ વિચાર્યું કે કાર્ડ લઇને લોકો ભૂલી જતા હોય છે. તે કાર્ડ ફેંકી દેવાતાં હોય છે, પરંતુ જો કુંડાં તેમના ઘરમાં રહેશે તો પરિવારની આ ખાસ ક્ષણો હંમેશાં યાદ રહેશે. 

સંબંધીઓને ૪૦૦ કુંડાં આપીને આમંત્રણ આપ્યું

પ્રતીકે જણાવ્યું કે અમે કાર્ડ ન છપાવ્યાં અને ભોપાલમાં પરિચિત તેમજ સંબંધીઓને ૪૦૦ કુંડાં આપીને આમંત્રણ આપ્યું. બહારના સંબંધીઓને વોટ્સએપ કરીને લગ્નમાં આવવાની વિનંતી કરી. આ પ્રયોગ સફળ રહ્યો અને લોકોએ તેની પ્રશંસા પણ કરી. આ ઉપરાંત લગ્નના સ્થળે બોર્ડ લગાવાયાં હતાં કે કોઇ પણ બુકે ન લાવે. પ્લાસ્ટિકનો ઉપયોગ બિલકુલ ન કરે. થાળીમાં ભોજન ન છોડે અને જેટલી જરૂર હોય તેટલું જ જમવાનું લે.