નર્મદા ડેમની સપાટી 135 મીટર પાર પહોંચી ગઇ છે. ઉપરવાસમાંથી 1 લાખ 80 હજાર ક્યુસેક પાણીની આવક થઇ છે. જેના કારણે ડેમની સપાટીમાં 24 કલાકમાં 20 સેમીનો વધારો થયો છે. નર્મદા ડેમના 15 દરવાજા 1.5 મીટર ખોલવામાં આવ્યા છે.
ડેમમાંથી નર્મદા નદીમાં 1 લાખ 70 હજાર ક્યુસેક પાણી છોડાઇ રહ્યું છે. ઊંચાઇ વધાર્યા બાદ પહેલીવખત ડેમ 84 ટકા જેટલો ભરાયો છે. નર્મદા ડેમમાં હાલ 4720 MCM લાઇ સ્ટોરેજ પાણીનો જથ્થો છે. હાલ RBPHના તમામ પાવર હાઉસ ચાલુ કરાયા છે.
મહેસાણાના ધરોઇ ડેમમાં પાણીની આવક વધી
મહેસાણાના ધરોઈ ડેમમાં પાણીની આવક વધી છે. હાલ ધરોઈ ડેમમાં પાણીની આવકમાં વધારો થઈ રહ્યો છે. હાલ ધરોઈ ડેમમાં 26 હજાર 321 કયુસેક પાણીની આવક થઈ રહી છે. ત્યારે હાલ ધરોઇ ડેમની જળસપાટી 606 ફૂટ નજીક પહોંચી છે. ધરોઇ ડેમની ભયજનક સપાટી 622 છે.
મહીસાગરના કડાણા ડેમમાંથી પાણી છોડવાનુ યથાવત્
મહીસાગરના કડાણા ડેમમાં સતત પાણીની આવક થઇ રહી છે. ત્યારે રુલ લેવલ મેન્ટેઇન કરવા પાણી છોડવામાં આવી રહ્યું છે. ડેમના 3 ગેટ 6 ફૂટ સુધી ખોલવામાં આવ્યા છે. ડેમમાંથી મહીસાગર નદીમાં 51 હજાર ક્યુસેક પાણી છોડાઇ રહ્યું છે. કડાણા ડેમમાં 65 હજાર ક્યુસેક પાણીની આવક થઇ છે. ડેમની હાલની જળ સપાટી 416.1 ફૂટ છે જ્યારે ભયજનક સપાટી 419 ફૂટ છે.
વરસાદને પગલે રાજકોટ જિલ્લાના જળાશયોમાં નવા નીરની આવક
રાજકોટ શહેર અને જિલ્લામાં સાર્વત્રિક વરસાદ નોંધાયો છે. રાત દરમિયાન સરેરાશ 7 ઈંચ વરસાદ નોંધાયો છે. વરસાદને પગલે જળાશયોમાં સતત પાણીની આવક થઈ રહી છે. જેને લઇને આજી-1 ડેમમાં પાણીની આવક થતા સપાટી 27.60 ફૂટ પર પહોંચી છે.
ડેમ ઓવરફ્લો થવામાં 1.40 ફૂટ જ બાકી છે. જ્યારે આજી-2 ડેમમાં પાણીની આવક થતા ડેમની સપાટી 28.60 ફૂટ પર પહોંચી છે. ડેમ ઓવરફ્લો થવામાં દોઢ ફૂટ જ બાકી છે. આ ઉપરાંત ન્યારી-1 ડેમની સપાટી 24.80 ફૂટ પર પહોંચી છે. જેમાં ડેમ ઓવરફ્લો થવામાં માત્ર 0.30 ફૂટ બાકી છે. જ્યારે ન્યારી-2 ડેમ ઓવરફ્લો થયો છે.
રાજ્યમાં ભારે વરસાદની આગાહી
ગુજરાતમાં આગામી 5 દિવસ ભારે વરસાદની આગાહી કરવામાં આવી છે. રાજસ્થાન પર વરસાદી સિસ્ટમ ફરી સક્રિય થતા પૂર્વ-મધ્ય ગુજરાત અને દક્ષિણ ગુજરાતમાં ભારે વરસાદની આગાહી કરવામાં આવી છે. જ્યારે સૌરાષ્ટ્રમાં પણ ભારે વરસાદ પડી શકે છે. આગામી 3થી 5 સપ્ટેમ્બરથી ઉત્તર ગુજરાતમાં ભારે વરસાદની આગાહી કરવામાં આવી છે.