મેઘમહેર / આનંદો: ઉપરવાસમાં પડેલા વરસાદને કારણે નર્મદા ડેમમાં નવા નીરની આવક, ખેડૂતો ખુશખુશાલ

• નર્મદા ડેમમાં નવા નીરની આવક 
• ખેડૂતોમાં ખુશીનો માહોલ 
• સારા વરસાદને કારણે ડેમમાં નવા નીર 

છેલ્લા ઘણા સમયથી રાજ્યમાં વરસાદની અછતને કારણે પાણીની અછત પણ સર્જાઈ હતી. ખાસ કરીને આ મુદ્દે ખેડૂતોને ભારે હાંલાકીનો સામનો કરવો પડી રહ્યો હતો. પરંતુ હવે સારો વરસાદ પડતા ખેડૂતોમાં આનંદનો માહોલ જોવા મળી રહ્યો છે. છેલ્લા 3 દિવસમાં રાજ્યમાં પડી રહેલા વરસાદને કારણે નર્મદા ડેમની જળસપાટીમાં વધારો થયો છે. 

12 કલાકમાં 21 સેમી પાણીનો વધારો 

ઉપરવાસમાં પડેલા વરસાદને લઈને હાલ નર્મદા ડેમની જળસપાટીમાં 12 કલાકમાં 21 સેમીનો વધારો થયો છે. નર્મદા ડેમની જળસપાટીમાં હાલ 116.6 મીટર જોવા મળી રહી છે.  ડેમમાં હાલ પાણીની આવક 8993 ક્યૂસેક જોવા મળી છે. સાથેજ સંગ્રહિત પાણીનો જથ્થો પણ 4408.09 MCM જેટલો જોવા મળી રહ્યો છે. 

ધરતીપુત્રો ખુશખુશાલ 

સૌરાષ્ટ્રમાં ગીર સોમનાથ જિલ્લામાં સાર્વત્રિક વરસાદથી ધરતીપુત્રોમાં ઉત્સાહ જોવા મળ્યો છે. ગીર સોમનાથના ગીરગઢડામાં 2 ઈંચ, સૂત્રાપાડા અને તાલાળામાં 1.5 ઈંચ વરસાદ પડ્યો છે. સોમનાથના ગીરગઢડામાં સૌથી વધુ વરસાદ પડ્યો છે. જ્યારે વેરાવળ, કોડિનાર અને ઉના તાલુકામાં સારા વરસાદથી પાકને જીવતદાન મળ્યું છે. તાલાલા ગીરમાં ધોધમાર વરસાદ પડતા ગામમાં નદી વહેતી થઈ છે. છેલ્લાં ત્રણ કલાકથી સતત વરસાદ પડી રહ્યો છે. તો ધોધમાર વરસાદને કારણે નદીઓમાં પાણીની આવક થઈ છે.

ગીરસોમનાથમાં ધોધમાર વરસાદ 

ગીર સોમનાથ જિલ્લાના વેરાવળ સહિત ગ્રામ્ય વિસ્તારોમાં ધોધમાર વરસાદ પડતા વેરાવળના ભેટાળી ગામે ખેતરોમાં પાણી ભરાયા છે. વેરાવળના ભેટાળી ગામે વરસાદ ખેંચાતા ખેડૂતો પરેશાન થયા હતા. જો કે, મેઘરાજાએ લાંબા વિરામ બાદ અમી છાંટણા કરતા ખેડૂતો આનંદીત બન્યાં છે. ધોધમાર વરસાદથી ખેડૂતોના પાકને જીવતદાન મળશે. ગીર સોમનાથમાં ધોધમાર વરસાદથી વોકળામાં પાણી આવ્યાં. આંબળાશ ગામે રસ્તા પર નદી વહી. જેપુર ગીર, ધરમપુર ગીર ગામે વોકળામાં પાણીની આવક નોંધાઈ. ધોધમાર વરસાદ પડતા રસ્તા પર વરસાદી પાણી ફરી વળ્યા.

મેઘમહેરથી પાકને નવું જીવનદાન 

તો દેવભૂમિ દ્વારકા જિલ્લામાં ભારે વરસાદથી પાકને નવુ જીવતદાન મળ્યું છે. દ્વારકાના કલ્યાણપુર અને આસપાસના તાલુકાઓમાં સાર્વત્રિક મેઘમહેરથી પાકને જીવતદાન મળ્યું છે. જ્યારે જૂનાગઢના ભેંસાણમાં ધીમીધારે વરસાદથી ખેડૂતોમાં નવી આશા જાગી છે. ભેસાણ પંથકમાં ધીમીધારે બે ઈંચ વરસાદ પડ્યો છે.