ટ્રાફિક રૂલ્સ / નંબર પ્લેટ સાથે ચેડાં કર્યા તો હવે ગયા સમજો, દંડ નહીં આ કાર્યવાહી થશે

હેલ્મેટ ના પહેરી હોય, રોંગ સાઇડમાં વાહન ચલાવતા હોય, સિગ્નલ તોડ્યું હોય તેવા દરેક કિસ્સામાં ટ્રાફિકના નિયમના ભંગ બદલ હાઇવે પ્રોજેકટ અંતર્ગત કેમેરા જ વાહનચાલકને ઇ-મેમો ફટકારવામાં ભાગ ભજવે છે પરંતુ કેટલાક વાહનચાલકો દંડથી બચવા હવે કેમેરાને પણ ઊંધાં ચશ્માં પહેરાવવા માટેની ચાલાકી કરી રહ્યા છે. 

વાહનચાલકો નંબર પ્લેટને ઢાંકી દે છે

કેટલાક વાહનચાલકો દંડથી બચવા નંબર પ્લેટને વાળી દે છે તો કેટલાક થોડા ઘણાં અંશે તોડી નાખે છે તો કેટલાક તેના પર કલર કરી નાખે છે કેટલાક લોકો તેના પર ધૂળ કે માટી ચોંટાડી દે છે. કેટલાંક બહેનો ડબલ સવારીમાં પાછળ બેસીને તેમનો દુપટ્ટો કે સાડીનો છેડાથી નંબર પ્લેટને ઢાંકી દે છે જેના કારણે કેમેરામાં વાહનનો નંબર ન દેખાય અને વાહનના નિયમ ભંગ બદલ દંડથી બચી શકાય. 

વાહનચાલકો ટ્રાફિક નિયમના દંડથી બચવા અવનવાં કીમિયા શોધે છે

આ અંગે એઆરટીઓ એસ.એ. મોજણીદારે જણાવ્યું હતું કે વાહનચાલકો ટ્રાફિક નિયમના દંડથી બચવા અવનવાં કીમિયા શોધી કાઢે છે. જે નિયમ વિરુદ્ધ છે. ખાસ કરીને વાહનની નંબર પ્લેટ સ્પષ્ટ રીતે વંચાય તે રીતની હોવી જોઇશે. નંબર પ્લેટમાં ચેડાં કરનારા વાહનચાલકો સામે વાહન જપ્તી સુધીની કડક કાર્યવાહી કરવામાં આવશે. 

ટ્રાફિકના નિયમ ભંગ બદલ કેમેરામાં ઝડપાય તો દંડનો મેમો સીધો તેમના ઘેર

હવે આવી ચાલાકી ચાલશે નહીં, નંબર પ્લેટ વળી ગયેલી, ઢાંકી દીધેલી, કલર કરેલી કે ખામી ભરેલ હશે તો વાહનચાલકે તેને તુર્ત જ બદલી દેવી પડશે નહીંતર ટ્રાફિક પોલીસ અને આરટીઓ તેમનું વાહન જપ્ત કરી લેશે. વાહનચાલકના ટ્રાફિકના નિયમ ભંગ બદલ કેમેરામાં ઝડપાય તો દંડનો મેમો સીધો તેમના ઘેર આવી જાય છે.

પોલીસ અપનાવશે જપ્તીનું હથિયાર

લોકો આવા દંડથી બચવા નીતનવાં ગતકડાં શોધી કાઢે છે. તેની સામે પોલીસ પણ હવે જપ્તીનું હથિયાર અજમાવશે. જે વાહનોમાં એચએસઆરપી નહીં હોય તેમને ટુ-વ્હીલરમાં રૂ.૩૦૦, થ્રી વ્હીલરમાં રૂ.૪૦૦ ફોર વ્હીલરમાં રૂ.પ૦૦ અને અન્ય ભારે વાહનોમાં રૂ.૧૦૦૦નો દંડ ભરવાની તૈયારી રાખવી પડશે.