કોરોના વાયરસ આવ્યો ત્યારથી તેનું રૂપ બદલાતું ગયું છે. થોડા થોડા સમયના અંતરે કોરોનાનાં લક્ષણોમાં ફેરફાર થતા રહ્યા છે. પહેલાં સામાન્ય તાવ, કફ અને શ્વાસની તકલીફથી તે ઓળખાતો હતો. ત્યારબાદ સૂંઘવાની અને સ્વાદ ન અનુભવવા જેવાં લક્ષણો જોવા મળ્યાં. પછી ચામડી પર ચકામાં દેખાય તો તેને પણ કોરોના વાયરસનું એક લક્ષણ માનવામાં આવ્યું.
મોંની અંદર લાલ ચકામાં નવા લક્ષણ તરીકે બહાર આવ્યા
હવે કોરોનાને લઇને નવાં લક્ષણો સામે આવ્યાં છે. જેમાં મોંની અંદર લાલ ચકામાં જોવા મળી રહ્યાં છે. કોરોનાનાં આ નવાં લક્ષણોનો દાવો સ્પેનના ડોક્ટર્સે કર્યો છે. તેમનું કહેવું છે કે, અત્યાર સુધી શરીરના બહારના ભાગમાં જ લાલ ચકામાં જોવા મળતાં હતાં. પરંતુ હવે મોંની અંદર પણ જોવા મળી રહ્યાં છે. આવા ઘણા કેસો તાજેતરમાં અમારી સામે આવ્યા છે.
આ લક્ષણોની પરિસ્થિતિને ઇનેનથમ નામ અપાયું
જર્નલ ઓફ ધ અમેરિકન મેડિકલ એસોસીએશનમાં પ્રકાશિત રિસર્ચમાં જણાવ્યા અનુસાર, આ પ્રકારનાં લક્ષણોની પરિસ્થિતિને ઇનેનથમ નામ આપવામાં આવ્યું છે. રિસર્ચર ડો. જુલિયંજ કોહેનું કહેવું છે કે, એપ્રિલમાં આવા ૨૧ દર્દીઓ જોવા મળ્યા, જેમની સ્કિન પર લાલ ચકામાં હતાં. તેમાં છ દર્દીઓ એવા હતા, જેમાં રેશિઝ મોંની અંદર હતાં. આ દર્દીઓની ઉંમર ૪૦થી ૬૯ વર્ષ વચ્ચે હતી. આ દર્દીઓમાં ચાર મહિલા હતી. કોરોનાનાં અન્ય લક્ષણો જોવા મળે તેના બે દિવસ પહેલેથી જ આવાં ચકામાં પડવાં લાગ્યાં હતાં. સંશોધકોનું કહેવું છે કે, ચેપ લાગ્યા બાદ શરીરના કોઈપણ ભાગમાં ચકામાં પડી શકે છે. જો કે, તેનું કારણ કોઈ દવાનું રિએક્શન નહીં પણ કોરોનાનો ચેપ હતો.
હવે દર્દીઓનો ઓરલ કેવિટી ટેસ્ટ પણ થવો જોઈએ: નિષ્ણાતોનો દાવો
અમેરિકાના સ્કિન સ્પેશિયાલિસ્ટ ડો. મિશે ગ્રીનના જણાવ્યા અનુસાર, આવા ઇનેનથમ નામનાં આ ચકામાં લાલ અથવા સફેદ રંગના સ્પોટમાં જોવા મળે છે અથવા તો મ્યૂકસ મેમ્બ્રેન પર સફેદ ડાઘા તરીકે જોવા મળે છે. વાયરસથી થતા રોગો એટલે કે ચિકનપોક્સમાં પણ આવાં ચકામાં જોવાં મળતાં હોય છે.
સ્પેનના સંશોધક ડો. જુલિયંજ કોહેના જણાવ્યા અનુસાર, કોવિડ-૧૯ થયા બાદ શરીરમાં કેવા પ્રકારના ફેરફાર પછી આ ચકામાં જોવા મળે છે તે વિશે અત્યાર સુધી શોધી નથી શકાયું. સંશોધકોનું કહેવું છે કે, કોરોનાના ઘણા દર્દીઓમાં ઓરલ કેવિટી પર ધ્યાન રાખવામાં ન આવ્યું. તેથી, હવે એવી સલાહ આપવામાં આવી રહી છે કે, આવા દર્દીઓનો ઓરલ કેવિટી ટેસ્ટ ચોક્કસપણે થવો જોઇએ.