રૂ. એકથી દસના તમામ સિક્કાઓ હવે ટૂંક સમયમાં બદલાઇ જશે. જ્યારે ૨૦ રૂપિયાનો સિક્કો આવશે કે પછી નોટ? લાંબી વિચારણા બાદ આખરે નક્કી થઇ ગયું છે કે હવે રૂ.૨૦ની કરન્સી નોટના સ્થાને એટલી જ રકમનો નવો સિક્કો બહાર પાડવામાં આવશે.
એટલું જ નહીં ભારત સરકાર દ્વારા રૂપિયા એકથી લઇને દસ સુધીના તમામ સિક્કાઓની સાઇઝ આકાર અને કલેવર બદલી નાંખવામાં આવશે. આ સિક્કાના પ્રોટોટાઇપ એટલે કે ડિઝાઇન તૈયાર થઇ ગઇ છે અને તેને ફાઇનલ કરવા આજે દિલ્હીમાં બેઠક યોજવા જઇ રહી છે.
આ બેઠકમાં નવી ડિઝાઇનવાળા સિક્કા સાથે રૂપિયા ૨૦ના નવા સિક્કાની કાયદેસરતા અંગે ભારતીય સિક્કા અધિનિયમ ૨૦૧૧ હેઠળ મહત્ત્વના નિર્ણય લેવાશે.
રૂપિયા ૨૦નો નવો સિક્કો અષ્ટકોણીય આકારનો હશે. એક અહેવાલ અનુસાર સિક્કાની ડિઝાઇન એવી રીતે તૈયાર કરવામાં આવશે કે દ્રષ્ટિની ખામી ધરાવતા અંધજનો પણ તેને સારી રીતે સ્પર્શ કરીને ઓળખી શકશે.
ભારત સરકારના આર્થિક વિભાગના અંડર સેક્રેટરીએ આ સંબંધે પત્ર બહાર પાડીને સિક્કાની ડિઝાઇન ફાઇનલ કરવા સંબંધિત વિભાગોની બેઠક બોલાવી છે.
આ અગાઉ રિઝર્વ બેન્ક ઓફ ઇન્ડિયા રૂપિયા ૨૦ની નવી નોટ જારી કરવા માટે તૈયારી કરી રહી હતી અને તેની ડિઝાઇનનો પણ આખરી ઓપ અપાઇ રહ્યો હતો પરંતુ હવે એવું મનાઇ રહ્યું છે કે નોટ બનાવવામાં વપરાતા કાગળને બચાવવા હવે સિક્કા જારી કરવામાં આવશે.
આ સંજોગોમાં હવે રૂ. ૨૦ની નવી નોટ ઇશ્યૂ કરવાનો નિર્ણય મોકૂફ પણ રાખી શકાય છે. સિક્યોરિટી પ્રિન્ટિંગ એન્ડ મિન્ટિંગ કોર્પોરેશન ઓફ ઇન્ડિયા લિમિટેડે આ અગાઉ વર્ષ ૨૦૧૧માં સિક્કાની ડિઝાઇનમાં ફેરફાર કર્યો હતો જેને ભારતીય સિક્કાની નવી સિરીઝ ૨૦૧૧ તરીકે ઓળખવામાં આવતી હતી.