ફેરફાર / સરકારે બદલ્યા PPFથી જોડાયેલા આ 4 અગત્યના નિયમો, વ્યાજદરમાં કર્યો ઘટાડો

• ભારત સરકારે PPF અકાઉન્ટને લઈને કર્યા ફેરફાર
• પીપીએફમાં રોકાણ કર્યું હોય તો મળે છે ટેક્સ બેનિફિટ
• લોન પર મળતા વ્યાજમાં થયો ઘટાડો

નવા નિયમ હેઠળ PPF અકાઉન્ટ હોલ્ડર એક વર્ષની અંદર ઘણી વખત પૈસા ડિપોઝિટ કરી શકે છે. આ પહેલાં એક નાણાકીય વર્ષમાં માત્ર 12 જ વખત પૈસા ડિપોઝિટ કરી શકાતા હતા. જોકે, આ અકાઉન્ટમાં એક વર્ષની અંદર કુલ 1.5 લાખ રૂપિયા જ જમા થઈ શકે છે. 

અકાઉન્ટ હોલ્ડરને લોન પર મળતા વ્યાજમાં 1 ટકાનો ઘટાડો

નવા નિયમ મુજબ PPF અકાઉન્ટ હોલ્ડરને લોન પર મળતા વ્યાજમાં 1 ટકાનો ઘટાડો કરવામાં આવ્યો છે. અગાઉ લોનની રકમ પર લેવામાં આવતું વ્યાજદર પીપીએફ ખાતા પરના વ્યાજ કરતા 2 ટકા વધારે હતું, જે હવે ઘટાડીને 1 ટકા કરી દેવામાં આવ્યું છે. અકાઉન્ટ હોલ્ડરની મૃત્યુની સ્થિતિમાં લોન પરનો વ્યાજ તેના નોમિનીએ ચૂકવવું પડશે. એટલું જ નહીં હવે પીપીએફ અકાઉન્ટ હોલ્ડર કોઈપણ નોન-હોમ પોસ્ટ ઓફિસ બ્રાન્ચ દ્વારા ગમે એટલી રકમ જમા કરાવી શકે છે. પોસ્ટલ વિભાગે તેની મંજૂરી આપી દીધી છે. અગાઉ તેની મર્યાદા માત્ર 25 હજાર રૂપિયા સુધીની હતી. 

આ કારણથી મેચ્યોર થતાં પહેલાં જ ખાતું બંધ થઈ શકે છે

નવા નિયમ મુજબ, જો પીપીએફ અકાઉન્ટ હોલ્ડર બીજા દેશની નાગરિકતા લે છે, તો એવી સ્થિતિમાં ખાતું મેચ્યોર થતાં પહેલાં જ બંધ થઈ શકે છે. જોકે, અગાઉ આ નિયમ નહોતો. તમને જણાવી દઈએ કે, અકાઉન્ટને પ્રી-મેચ્યોર બંધ કરવાના કેટલીક ખાસ શરતો છે. ઉદાહરણ તરીકે, અકાઉન્ટ હોલ્ડર અથવા તેના આશ્રિત બાળકો ઉચ્ચ અભ્યાસ કરવા માગે છે.