નિર્ણય / ડોનાલ્ડ ટ્રમ્પે લીધો એવો નિર્ણય કે ભારતની વધી શકે છે મુશ્કેલી, આપ્યો આ આદેશ

• દવાઓના નિર્માણમાં 'આત્મનિર્ભર' બનવા માંગે છે અમેરિકા 
• ટ્રમ્પના આદેશથી ભારતના ઉદ્યોગને લાંબાગાળે થશે અસર 
• અમેરિકામાં ભારતની દવાઓ સૌથી વધારે આયાત થાય છે 

ડોનાલ્ડ ટ્રમ્પે એક મિટિંગમાં બધા જ વિભાગોને દવાના નિર્માણ પર કમજોર કડીને ઓળખીને તેના પર કામ કરવા કહ્યું. સાથે જ તેમણે બધી જ જરૂરી દવાઓનું લિસ્ટ બનાવી તેને વહેલામાં વહેલી તકે ક્લિયરન્સ આપી દેવા કહ્યું જેથી તે દવાઓ પોતાના જ દેશમાં બની શકે. 

અમેરિકા જેવા દેશો દવાઓ માટે ભારત અને ચીન પર નિર્ભર રહે છે. કોરોના વાયરસ મહામારી દરમિયાન પણ અમેરિકા કઈ રીતે વિકાસશીલ દેશો પર નિર્ભર છે તે દુનિયાની સામે આવી ગયું છે. આ દરમિયાન ટ્રમ્પે હાઈડ્રોકસીક્લોરોક્વીનને કોરોનાની એક ચમત્કારિક દવા કહ્યું અને ભારત જ તેમાં સૌથી મોટો ઉત્પાદક અને નિકાસકાર તરીકે સામે આવ્યું. જે બાદ પરિસ્થિતિને જોતા અમેરિકાએ નક્કી કર્યું છે કે દવાઓ જાતે જ બનાવવી જોઈએ. 

ભારતની સૌથી વધુ દવાઓ અમેરિકામાં આયાત થાય છે, કહેવામાં આવે છે કે અમેરિકાની દર ત્રીજી દવાએ ભારતની છે. ભારતથી દવાઓ આયાત કરવામાં 6 ડોલર બિલીયનનો ખર્ચ થાય છે. ભારતની દવાની કિંમત ઓછી અને ગુણવત્તા સારી હોવાના કારણે અમેરિકા તેને હાથોહાથ ખરીદી લે છે. હાલમાં ટ્રમ્પ દ્વારા જે આદેશ આપવામાં આવ્યો છે તે કોઈ એક દેશ માટે નથી પરંતુ અમેરિકાની દવા કંપનીઓ માની રહી છે કે મૂળરૂપે ચીન પરથી નિર્ભરતા ખતમ કરવા માટે ટ્રમ્પે આ નિર્ણય લીધો છે પરંતુ ભારત પર પણ તેની અસર થશે. 

જોકે માનવામાં આવી રહ્યું છે કે અસર તો થશે પરંતુ એટલી બધી નહીં થાય.  ઈન્ડીયન એક્સપ્રેસના અહેવાલમાં PHARMEXCILના ચેરમેન દિનેશ દુઆએ કહ્યું કે તેનું મોટું કારણ એ છે કે મોટા ભાગની દવાઓ અમેરિકાના સાર્વજનિક ખરીદ પ્રક્રિયામાં સામેલ નથી.  આ સિવાય ટ્રમ્પ દ્વારા આપવામાં આવેલ આદેશમાં કેટલીક છૂટ છે જેમાં ભારત આવે છે. જોકે આશંકા છે કે લાંબા સમયમાં અમેરિકા પોતાની દવાઓ બનાવવા લાગશે ત્યારે ભારતના દવા ઉદ્યોગને નુકસાન તો થશે જ.