નિયમ / ચાર દિવસમાં સવા લાખ લોકોએ મોટર ઈન્સ્યોરન્સ પોલિસી ખરીદી

૧ સપ્ટેમ્બરથી નવા મોટર વિહિકલ્સની કડક જોગવાઇઓનો અમલ શરૂ થવાના પગલે ઓનલાઇન વીમા ખરીદનારાઓની સંખ્યા જબરજસ્ત વધી ગઇ છે. નવા કાયદાની કડક જોગવાઇઓના સંદર્ભમાં માત્ર ચાર દિવસમાં સવા લાખ લોકોએ ઓનલાઇન મોટર ઇન્સ્યોરન્સની ખરીદી કરી છે. 

ઓનલાઇન પોલિસી પ્રોવાઇડર પોલિસી બજાર ડોટકોમના જણાવ્યા અનુસાર વાહન વીમો ખરીદનારા લગભગ ૯૦ ટકા લોકોમાં એમનો સમાવેશ થાય છે કે જેમની પોલિસી પહેલેથી જ લેપ્સ થઇ ગઇ છે.

આમ, નવા નિયમ લાગુ થયા બાદ ટુ વ્હીલર્સ અને ફોર વ્હીલર્સ વાહનો માટે વીમા ખરીદનારાની સંખ્યા બમણી થઇ ગઇ છે. પોલિસી બજાર ડોટકોમના ચીફ બિઝનેસ ઓફિસર તરુણ માથુરે જણાવ્યા મુજબ નવા નિયમ લાગુ થયા બાદ અમે અમારા પ્લેટફોર્મ પરથી રોજ અંદાજે ૩૦ હજાર મોટર ઇન્સ્યોરન્સ પોલિસીનું વેચાણ કરી રહ્યા છીએ. 

તેમણે જણાવ્યું હતું કે ટ્રાફિકના નિયમોના પાલનને લઇને મોટર વિહિકલ સુધારા વિધેયક ૨૦૧૯ એક સકારાત્મક પગલું છે. દેશમાં અત્યારે ૧૯ કરોડ વાહન રજિસ્ટર્ડ છે, પરંતુ માત્ર ૮.૨૬ કરોડ વાહનો પાસે જ વીમો છે.

મળતી માહિતી અનુસાર દિલ્હી પોલીસે નવો વાહન નિયમ લાગૂ થવાના પહેલા દિવસે જ 3900 મેમો ફાડ્યા.