આવતી કાલથી નવા ટ્રાફિક નિયમ લાગુ થઈ રહ્યા છે. ત્યારે RTOમાં વાહનચાલકોનો ધસારો જોવા મળી રહ્યો છે. પણ RTOના અધિકારીઓ હજી દિવાળી વેકેશનના મૂડમાં જ છે. તેમની સુસ્તી ઉડી જ નથી રહી વાહનચાલકોમાં આવી ફરિયાદનો સૂર ઉઠી રહ્યો છે.
રાજ્યમાં 1 નવેમ્બરથી ટ્રાફિકના નિયમનું અમલ
નવા ટ્રાફિક નિયમનું કડકપણે થશે અમલીકરણ
RTOમાં લાયસન્સ માટે વાહન ચાલકોની લાંબી કતાર
રાજ્યમાં એક નવેમ્બરથી ટ્રાફિકના નવા નિયમનું અમલ થવા જઈ રહ્યું છે. નવા ટ્રાફિકના નિયમનું કડકપણે રાજ્યમાં અમલીકરણ થશે. RTOમાં લાયસન્સ માટે વાહન ચાલકોની લાંબી કતાર જોવા મળી રહી છે. RTOમાં અધિકારીઓ સમયસર ન આવતા અરજદારોમાં રોષ જોવા મળી રહ્યો છે. અધિકારીઓની ઢીલી કામગીરીને લઈને લોકોને પરેશાનીનો સામનો કરવાનો વારો આવ્યો છે.
8000થી વધુ લોકો દર વર્ષે અકસ્માતમાં જીવ ગુમાવે છે
દર વર્ષે ગુજરાતમાં લગભગ 20 હજાર જેટલા અકસ્માત થાય છે, જેમાં લગભગ આઠ હજાર લોકોનાં મૃત્યુ થાય છે. રાજ્ય સરકાર દ્વારા અલગ-અલગ 50 જેટલી કલમોમાં સુધારો કરવામાં આવ્યો છે. સ્થળ ઉપર દંડ સિવાય ઈ-ચલણની વ્યસ્થા ચાલુ રહેશે.
શું કહે છે આર સી ફળદુ
મંત્રી આર સી ફળદુએ જણાવ્યુ હતુ કે, 1 નવેમ્બરથી નવો મોટર વ્હીકલ એક્ટ લાગુ થશે. કાયદા મુજબ કડક અમલવારી કરાશે. હેલ્મેટ વિહોણા અનેક ચાલકોએ જીવ ગુમાવ્યા છે. હવેથી હેલ્મેટ ન પહેરનાર સામે કડક પગલા લેવામાં આવશે. એ સિવાય પણ બીજા નિયમોનું કડક પાલન કરાવવામાં આવશે.
હેલમેટ વગર નહીં ચલાવી શકો વાહન
રાજ્યમાં હેલ્મેટ વગર વાહન ચલાવવા બદલ દંડની રકમ રૂ. 500 કરી દેવામાં આવી છે, જે અગાઉ રૂ. 100 હતી. કેન્દ્ર સરકાર દ્વારા રૂ. 1000 દંડની જોગવાઈ કરવામાં આવી છે. જો ટૂ-વ્હિલરમાં પાછળ બેસનારી વ્યક્તિ પાસે હેલ્મેટ નહીં હોય તો તેને કોઈ દંડ નહીં થાય. પરંતુ ટ્રિપલ સવારી માટે દર વખતે રૂ. 100-100નો દંડ થશે. સીટ-બેલ્ટ વગર વાહન ચલાવવા બદલ રૂ. 500નો દંડ થશે, કેન્દ્ર સરકારના કાયદામાં રૂ. 1000 ના દંડની જોગવાઈ કરવામાં આવી છે.
RC બુક હોવી પણ ફરજિયાચ
RC બૂક (રજિસ્ટ્રેશન સર્ટિફિકેટ) વગર કોઈ વાહન ચલાવતા પકડાશે તો પહેલી વખત રૂ. 500 અને બીજી વખત પકડાશે તો રૂ. 1,000નો દંડ થશે. રજિસ્ટ્રેશન વગર ટૂ-વ્હિલર ચલાવવા બદલ રૂ. 2000, રૂ. 3000 અને રૂ. 5000 એમ વાહનોની શ્રેણીના આધારે ત્રણ તબક્કામાં દંડને વિભાજિત કરવામાં આવ્યો છે. લાઇસન્સ વગર વાહન ચલાવા બદલ રૂ. 3000નો દંડ થશે, જો અન્ય કોઈનું વાહન હશે તો વાહનમાલિકને પણ રૂ. રૂ. 3000નો દંડ થશે.
લાઈસન્સ વગર વાહન ચલાવવા સબબ
લાઇસન્સ વગરનાં ટૂ-વ્હિલરને ચલાવવા બદલ રૂ. 2000 અને તેથી ઉપરનાં વાહનો માટે રૂ. રૂ. 3000ના દંડની જાહેરાત કરવામાં આવી છે. કેન્દ્ર સરકારના કાયદામાં રૂ. 5000ના દંડની જોગવાઈ કરવામાં આવી છે.
ચાલુ વાહને મોબાઈલ ઉપર વાત કરતા પકડાઓ તો
ચાલુ વાહને મોબાઇલ ઉપર વાત કરવા બદલ પ્રથમ વખત રૂ. 500 અને બીજી વખત રૂ.1,000નો દંડ થશે. રોડ-ટ્રાન્સપૉર્ટ તથા ટ્રાફિક-પોલીસને દંડ વસૂલવાની સત્તા રહેશે, જોકે અમુક પ્રકારના દંડ લાગુ કરવાની કે તેના માંડવાળની સત્તા કોર્ટ પાસે જ રહેશે.
વાહન ઓવરસ્પીડથી નહી ચલાવી શકો
ભયજનક રીતે વાહન ચલાવવા બદલ ટૂ અને થ્રી-વ્હિલરને રૂ. 1,500, લાઇટ મોટર વિહિકલને રૂ. 3,000 અને ભારે વાહનોને રૂ. 5,000નો દંડ થશે. પૂરપાટ ઝડપે વાહન ચલાવવા બદલ ટૂ-વ્હિલર, થ્રી-વ્હિલર કે ટ્રેક્ટરને રૂ. 1,500, લાઇટ મોટર વિહિકલને રૂ. 3,000 અને ભારે વાહનોને રૂ. 4,000નો દંડ થશે. એક્સપ્રેસ હાઈવે ઉપર જો મોટરની ઝડપ 120 કિલોમિટર પ્રતિકલાકથી વધુ હશે તો તેને ઓવરસ્પીડ ગણવામાં આવશે. નેશનલ હાઈવે તથા ફૉરલૅન માટે 100 કિલોમિટર પ્રતિકલાકની ઝડપને 'પૂરપાટ' ઝડપ તરીકે નક્કી કરવામાં આવી છે.
જાહેરમાં વાહન ચલાવવાની હરિફાઈ પર રોક
જાહેરમાં વાહનોની હરીફાઈ કરવા તથા ભયજનક રીતે વાહન ચલાવવા બદલ રૂ. 5,000ના દંડની જોગાઈ કરવામાં આવી છે. કેન્દ્ર સરકારે પણ આને માટે રૂ. 5000 દંડ ઠરાવેલો છે. આમાં જો બીજીવાર પકડાશે તો 10,000 રૂપિયાનો દંડ થશે.
એમ્બ્યુલન્સ, ફાયરબ્રિગેડને ફરજિયાત આપવી પડશે સાઈડ
જો કોઈ વાહન ઍમ્બુલન્સ કે ફાયર બ્રિગેડના વાહનના માર્ગમાં અડચણ ઊભી કરે તો રૂ. 1000ના દંડની જોગવાઈ કરવામાં આવી છે, અગાઉ આ દંડ રૂ.100નો હતો.