બજેટ 2025 / સંસદમાં આગામી સપ્તાહમાં રજૂ કરાશે ન્યૂ ઇન્કમટેક્સ બિલ, આજે મળી શકે છે કેબિનેટની મંજૂરી

New Income Tax Bill: નાણા સચિવે જણાવ્યું હતું કે હાલ પ્રવર્તમાન આવકવેરા કાયદો 6 દાયકા જૂનો છે અને વર્ષ 1961 ના આ આવકવેરા બિલને બદલવા માટે નવું આવકવેરા બિલ તૈયાર કરવામાં આવ્યું છે. તેમણે વધુમાં જણાવ્યું કે નવા આવકવેરા બિલમાં કોઈ નવો કર કે કોઈપણ પ્રકારનો નવો બોજ લાદવામાં આવશે નહીં. આ બિલમાં બજેટ 2025-26માં આવકવેરા દરો, સ્લેબ અને સ્રોત પર કર કપાત (TDS) જોગવાઈઓમાં કરવામાં આવેલા ફેરફારોનો પણ સમાવેશ કરવામાં આવશે. તેમણે કહ્યું કે અમે નીતિમાં કોઈ મોટા ફેરફાર કરી રહ્યા નથી. એવું માનવામાં આવી રહ્યું છે કે નવા આવકવેરા કાયદા બિલ દ્વારા ટેક્સેશન સિસ્ટમને સરળ અને પારદર્શક બનાવી શકાશે. તેનાથી આવકવેરા કાયદાની ભાષા સરળ થશે અને ટેક્સ ભરવાનું પણ સરળ થશે. 1961થી અમલી આવકવેરા કાયદો માં ફેરફારની તૈયારી છે.

આજે મળી શકે છે બિલને મંજૂરી

મળતી માહિતી મુજબ સંસદમાં આજે એટલે કે શુક્રવાર 7 ફેબ્રુઆરીએ સાંજે વડાપ્રધાન નરેન્દ્ર મોદીની અધ્યક્ષતામાં થનારી કેબિનેટ બેઠકમાં નવા આવકવેરા બિલને મંજૂરી મળવાની સંભાવના છે અને સાથે એવું પણ મનાઈ રહ્યું છે કે આ બિલને સરકાર 10 ફેબ્રુઆરીના રોજ સંસદમાં રજૂ કરશે. તો સાથે એવું પણ કહેવાઈ રહ્યું છે કે જો આ બિલને મંજૂરી મળી ગઈ તો આવનાર નાણાકીય વર્ષ એટલે કે 1 એપ્રિલથી નવી ટેક્સ સિસ્ટમ લાગૂ થવાની શક્યતા છે.

નવા આવકવેરામાં શું ફેરફાર થશે ચાલો જાણીએ.

• હાલનો Income Tax Act 1961થી અમલમાં છે. તેને પૂરી રીતે નાબૂદ કરીને નવો કાયદો અમલમાં મુકવામાં આવશે. જે આજની જરૂરિયાત મુજબ અપગ્રેડ અને અપડેટ કરેલો હશે.
• રિપોર્ટ મુજબ આ બિલમાં ટેક્સ સ્લેબમાં કોઈ ફેરફાર કરવામાં આવશે નહીં એટલ કે જે પ્રવર્તમાન ટેક્સ સ્લેબ છે તે ભવિષ્યમાં પણ રહેશે. ટેક્સ સિસ્ટમને વધુ સરળ અને તર્કસંગત બનાવવામાં આવશે.
• ટેક્સ ફાઈલ કરવાની પ્રોસેસને સંપૂર્ણ ડિજિટલ કરવામાં આવશે જેથી પેપર વર્ક ઓછું થશે અને સરળતાથી ટેક્સ ફાઇલ કરી શકાશે.
• સરકારનું ફોકસ ટેક્સ સંબંધિત કેસોને ઘટાડવા પર છે. નવા ટેક્સ નિયમોને વધુ પારદર્શક બનાવવામાં આવશે જેથી કરીને કોઈ પ્રકારની મુશ્કેલીઓ ન થાય. તેનાથી ટેક્સપેયર્સને તકલીફમાં ઘટાડો થશે.
• સરકાર તરફથી અસેસમેન્ટ યર અને ફાઈનાન્શિયલ યરને પણ એક કરવા એટલે કે ભેગું કરવા, મર્જ કરવા પર વિચાર કરાઈ રહ્યો છે.
• નવો કાયદો વિદેશી કંપનીઓ અને ઈન્વેસ્ટર્સ માટે પણ સરળ રહેવા પામશે જેથી વિદેશી હુંડિયામણ અને વિદેશી રોકાણ વધી શકે છે.
• નવો આવકવેરા કાયદો ઓછા અને સરળ શબ્દોમાં હશે. તેનો હેતુ સામાન્ય લોકોને પણ સરળતાથી સમજ પડે તે છે. હાલનો કાયદો 6 લાખ શબ્દોમાં લખાયેલો છે જેને ઘટાડીને અડધો કરાશે.

નવો કાયદો સમજવામાં સરળ હશે

પાંડેએ કહ્યું કે નવો કાયદો સરળ હશે. તેમાં લાંબા વાક્યો, જોગવાઈઓ અને સમજૂતીઓ હશે નહીં. તેમણે કહ્યું કે કાયદા ફક્ત કાનૂની વ્યાવસાયિકો માટે જ નથી. કરદાતાઓને કાયદાની ભાષા સમજવામાં મદદ મળે તે માટે તેને સરળ બનાવવાનો પ્રયાસ કરવામાં આવ્યો છે. નવા કાયદાને સંક્ષિપ્ત બનાવવામાં આવ્યો છે, જૂની જોગવાઈઓ દૂર કરવામાં આવી છે અને તેને ઓછો બોજારૂપ બનાવવામાં આવ્યો છે.

વધુ વાંચો: આજે RBI ઘટાડી શકે છે રેપો રેટ, શું લોન ધારકોને મળશે રાહત?

બિનજરૂરી જોગવાઈઓ દૂર કરવામાં આવશે

ઉલ્લેખનીય છે કે લોકસભામાં રજૂ કરાયેલા બજેટ દરમિયાન નાણામંત્રી નિર્મલા સીતારમણે નવા આવકવેરા બિલની જાહેરાત કરી હતી. નાણા મંત્રાલય સાથે સંકળાયેલા અધિકારીઓનું કહેવું છે કે તૈયાર કરેલું બિલ આંતરરાષ્ટ્રીય ધોરણો અનુસાર હશે. આનાથી દેશમાં આવકવેરા સંબંધિત પ્રક્રિયામાં મોટો ફેરફાર થશે. અધિકારીઓએ જણાવ્યું હતું કે વ્યક્તિગત આવકવેરા ભરનારાઓથી લઈને કોર્પોરેટ ક્ષેત્ર સુધી, દરેકને નવા કાયદામાં બિનજરૂરી જોગવાઈઓથી મુક્તિ મળશે. આનો અર્થ એ થયો કે નાના કેસોમાં નોટિસ જારી કરવામાં આવશે નહીં.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ