ઓનલાઇન શોપિંગ કરનારાના 'બૂરે દિન' શરૂ નહી મળે કેશબેક અને શાનદાર ડિસ્કાઉન્ટ

દેશમાં ઓનલાઇન શૉપિંગના બિઝનેસમાં બદલાવ આવવા જઇ રહ્યો છે. સરકારે ઇ-કોમર્સ કંપનીઓ માટે નવા નિયમો લાગૂ કર્યા છે. હવેથી ઇ-કોમર્સ કંપનીઓ એક્સક્લૂઝિવ ડીલ કેશબેક અને બમ્પર ડિસ્કાઉન્ટ નહી આપી શકે. સરકારે ઇ-કોમર્સ સેક્ટર માટે ફોરેન ડિરેક્ટ ઇન્વેસ્ટમેન્ટની પોલિસીમાં સુધારો કર્યો છે જે કારણે એમેઝોન અને ફ્લિપકાર્ટ જેવી કંપનીઓને મોટો ઝટકો લાગ્યો છે. સ્થાનિક વેપારીઓના ગુસ્સો શાંત કરવા માટે સરકારે આ પગલું ભર્યુ છે. સ્થાનિક વેપારીઓને આ કંપનીઓના કામ કરવાની પ્રદ્ઘતિથી નારાજગી હતી. 

નવા નિયમનુસાર કોઇપણ એકમ માત્ર કોઇ એક સાઇટ પર સામાન નહી વેચી શકે. આ ઉપરાંત વેપારી ઇ-કોમર્સ સાઇટ પર કેટલું વેચી શકશે તે માટેની લિમિટ પણ નક્કી કરવામાં આવી છે. આ કારણે ઇ-કોમર્સ કંપની એ પોતાના બિઝનેસ મોડલમાં ફેરફાર કરવો પડશે. 

નવા નિયમનુસાર ઇ-કોમર્સ પ્લેટફોર્મ પર કોઇ ખાસ સપ્લાયરને ફાયદો નહી કરાવી શકે. આ પછી કેશ બેક એક્સક્લૂઝિવ સેલ કે કોઇ પોર્ટલ પર બ્રાન્ડ લોન્ચ પર બ્રેક વાગી શકે છે. આ ઉપરાંત ગ્રાહકોને સ્પેશિયલ લાભ આપતી એમેઝોન પ્રાઇમ ફ્લિપાકાર્ટ એશ્યોર્ડ જેવી ડીલ્સને પણ મુશ્કેલી પડી શકે છે. નવા નિયમો લાગૂ કરવાનો મુખ્ય હેતુ ઇ-કોમર્સ પ્લેટફોર્મ કોઇપણ પ્રકારના પક્ષપાત વગર વેપાર કરે તે છે. 

અત્યારે ક્લાઉડ ટેલ એમેઝોન સાથે અને વોલ માર્ટ ફ્લિપકાર્ટ સાથે જોડાયેલુ છે. નવા નિયમનુસાર તેમને પોતાનો સામાન આ સાઇટ્સ પર વેચવામાં મુશ્કેલી પડી શકે છે. ફ્લિપકાર્ટની નવી માલિક વૉલ માર્ટ પોતે આ પ્લેટફોર્મ પર સામાન વેચી નહી શકે .