સરકાર આગામી જુલાઇ માસથી રાજ્યની આઈટીઆઈમાં ડ્રોન કોર્ષ શરૂ કરવા જઈ રહી છે.
રાજ્યની ઔદ્યોગિક તાલીમ સંસ્થા દ્વારા શરૂ થશે નવો કોર્ષ
રાજ્ય સરકાર જૂલાઇ મહિનામાં લોન્ચ કરશે ડ્રોન કોર્ષ
રાજ્યની 50 જેટલી ITIમાં શરૂ થશે નવી કોર્ષ
રાજ્ય સરકાર દ્વારા રાજ્યની આઈટીઆઈમાં ડ્રોન કોર્ષ શરૂ કરવાની દિશામાં મહત્વપૂર્ણ નિર્ણય કરવામાં આવ્યો છે. રાજ્ય સરકારના શ્રમ અને રોજગાર વિભાગ દ્વારા રાજ્યની 50 ITIમાં આગામી જુલાઈ મહિનાથી ડ્રોન કોર્સનો પ્રારંભ કરવામાં આવશે. જેને પગલે દરેક ITI ખાતે બે ડ્રોન આપી વિદ્યાર્થીઓને ડ્રોન અંગેની તાલીમ આપવામાં આવશે. મહત્વનું છે કે, સરકારનો આ નિર્ણય ઉમેદવારોને આત્મનિર્ભર કરવાની દિશામાં યશસ્વી યોગદાન આપશે.
અમદાવાદમાં બનશે ડ્રોન ટેકનિકલ યુનિટ
સરકાર દ્વારા રાજ્યમાં શિક્ષણનું સ્તર સુધારવા માટે અનેક મથામણ કરવામાં આવી રહ્યા છે. જેના ભાગરૂપે રાજ્યની ઔદ્યોગિક તાલીમ સંસ્થામાં ડ્રોન કોર્ષની આગામી સમયમાં શરૂઆત કરવામાં આવશે. નોંધનિય છે કે, ખાનગી ક્ષેત્રમાં આ કોર્સની કિંમત 50,000 રૂપિયાથી પણ ઉપર છે ત્યારે રાજ્ય સરકારની ITI અને કૌશલ્ય યુનિવર્સિટીમાં આ કોર્ષ મામૂલી દરે શરૂ કરવામાં આવશે. આ અંગેની પ્રાથમિક વિગત અનુસાર પ્રથમ તબક્કામાં અમદાવાદ, રાજકોટ, સુરત, વડોદરા અને કૌશલ્ય યુનિવર્સિટીમાં ડ્રોન કોર્સનો પ્રારંભ કરવામાં આવશે. આ કોર્ષને લઈને અમદાવાદમાં ડ્રોન ટેકનિકલ યુનિટ પણ બને તેવી માહિતી મળી રહી છે. ડિજિટલ યુગમાં બાળકોમાં આ અંગેના કૌશલ્યનો વિકાસ થાય અને વિદ્યાર્થીઓ આત્મનિર્ભર તેવા ભાવથી સરકાર આ દિશામાં આગળ વધી રહી છે.
7 દિવસની તાલીમ બાદ લેખિત પરીક્ષા ફરજિયાત
રાજ્યની 50 જેટલી ITIમાં આ કોર્ષ શરૂ કરાશે. જેને લઈને 7 દિવસ દરમિયાન કોર્ષમાં 3 દિવસ વિદ્યાર્થીઓને પ્રેક્ટિકલ કરાવવામાં આવશે અને 4 દિવસ ઉમેદવરોને થિયરીકલ જ્ઞાન આપવામાં આવશે.પ્રેક્ટિકલ નૉલેજને પગલે રાજ્યની દરેક ITI બે ડ્રોન પણ આપવામાં આવશે.આ કોર્ષમાં ખેતી, પોલીસ સર્વેલન્સ, ડિઝાસ્ટરને લગતી કામગીરી કરી શકશે. આ 7 દિવસની તાલીમ બાદ વિદ્યાર્થીઓએ લેખિત પરીક્ષા ફરજિયાત આપવી પડશે. પરીક્ષામાં પાસ થયેલ ઉમેદવારોને કેન્દ્રના DGCA દ્વારા ફ્લાઈંગ લાઇસન્સ આપવામાં આવશે. આ લાયસન્સની અવધી પાંચ વર્ષ સુધીની રહેશે અને ત્યારબાદ તેઓએ ફરીથી પરીક્ષા આપીને લાયસન્સ રિન્યૂ કરાવવું પડશે.