કોરોના / ક્યારે ટળશે કોરોના સંકટ, શું ઓમિક્રોન બાદ હજી નવો વેરિએન્ટ આવશે ? જાણો શું કહી રહ્યા છે એક્સપર્ટ

• કોરોનાને લઇને વૈજ્ઞાનિક-નિષ્ણાંતોનું નિવેદન
• કોરોના સ્થાનિક રોગ બની જશે
• હજુ નવો વેરિએન્ટ જોવા મળી શકે છે 

છેલ્લા ત્રણ વર્ષમાં કોરોના મહામારીએ સમગ્ર વિશ્વમાં તબાહી મચાવી છે. લાખો લોકો આ રોગચાળાનો શિકાર બન્યા, લાખો લોકો દુનિયા છોડી ગયા. ઘણા વિકસિત દેશોમાં આરોગ્ય પ્રણાલી પડી ભાંગી, અર્થવ્યવસ્થા પડી ભાંગી. આવી સ્થિતિમાં દરેકના મનમાં સવાલ ઉઠી રહ્યો છે કે આ મહામારીનો અંત ક્યારે આવશે. શું ઓમિક્રોનની જેમ કોરોનાનું બીજું નવું વેરિઅન્ટ દુનિયામાં આવશે? એક નવા અભ્યાસમાં આ પ્રશ્નનો જવાબ આપવામાં આવ્યો છે.

નવો વેરિએન્ટ આવી શકે છે 

નિષ્ણાતોનું માનવું છે કે કોરોના મહામારીનો અંત આવાનો નથી. આવનારા સમયમાં તે એક સ્થાનિક રોગચાળો બની જશે અને આપણે તેની સાથે જીવતા શીખવું પડશે. સંશોધકોના મતે, ઓમિક્રોન ચોક્કસપણે કોરોનાનો છેલ્લો પ્રકાર નથી. આવનારા સમયમાં વધુ વેરિઅન્ટ્સ પણ જોવા મળી શકે છે. લંડન સ્કૂલ ઓફ હાઈજીન એન્ડ ટ્રોપિકલ મેડિસિનનાં રોગચાળાના નિષ્ણાત સેબેસ્ટિયન ફંકે જણાવ્યું હતું કે આપણી રોગપ્રતિકારક શક્તિને કારણે આપણે આ પ્રકારની પરિસ્થિતિને સામાન્ય બનાવી શકીએ છીએ. તેમણે કહ્યું કે આવનારા સમયમાં બહુ જીવલેણ રોગચાળો જોવા નહીં મળે.

આ વૈજ્ઞાનિકે ચેતવણી આપી
ટોચના વાઈરોલોજિસ્ટ એરિસ કાટજોરકીસે કોરોના સામે ચેતવણી આપી છે. તેમણે કહ્યું કે કોરોના એક સ્થાનિક રોગ બની જશે, પરંતુ માત્ર આના કારણે તેને હળવાશથી લેવાની ભૂલ ન કરો. તેમણે કહ્યું કે સ્થાનિક રોગ પણ મોટો ખતરો બની શકે છે. વધુમાં એમ પણ જણાવ્યું કે વિજ્ઞાનના સંદર્ભમાં, સ્થાનિક હોવાનો અર્થ એ છે કે કોરોનાથી સંક્રમિત લોકોની સંખ્યા મૂળ વસ્તીને સંતુલિત કરે છે.

ઓમિક્રોન સામે વર્તમાન રસી અસરકારક નથી
ઘણા નિષ્ણાતો કહે છે કે હાલની કોરોના રસી ઓમિક્રોન સામે અસરકારક સાબિત થઈ રહી નથી. ઘણી પ્રયોગશાળાઓમાં થયેલા અભ્યાસો દર્શાવે છે કે આ રસીઓ ઓમિક્રોન સામે થોડા જ એન્ટિબોડીઝ ઉત્પન્ન કરે છે.

ઓમિક્રોન ખતરનાક બની રહ્યો છે
પ્રારંભિક અભ્યાસમાં જાણવા મળ્યું છે કે ઓમિક્રોન અગાઉના ડેલ્ટા વેરિઅન્ટ જેટલું જોખમી નથી. આ પ્રકારમાં મૃત્યુદર અને હોસ્પિટલમાં દાખલ થવાનું ઓછું જોખમ છે. જો કે, હવે જેમ જેમ આ ઓમિક્રોનનો ચેપ વધી રહ્યો છે તેમ તેમ હોસ્પિટલમાં દર્દીઓની સંખ્યા વધી રહી છે.. ઘણા દેશોમાં તો આરોગ્ય સેવાઓ પણ મર્યાદિત થઇ ગઇ છે.