લોકસભાની ચૂંટણીનાં હવે 19 દિવસ બાકી છે ત્યારે અમદાવાદની પૂર્વ અને પશ્ચિમ બેઠકનાં ઉમેદવારો જીત બાદ કેવું અમદાવાદ ઈચ્છી રહ્યાં છે તે જાણીએ. કોઈ ઉમેદવારો ગરીબી દૂર કરવાનાં તો ઉમેદવારો પ્રાથમિક સમસ્યાનો ઉકેલ લાવવાનાં દાવાં કરી રહ્યાં છે. તો કોઈ પ્રતિસ્પર્ધીઓનાં દાવાઓને ખુલ્લાં પાડવા સ્પર્ધામાં જોડાયાં છે ત્યારે આવો જાણીએ ઉમેદવારોનાં મતે શું છે અમદાવાદ અને કેવું ઈચ્છે છે તેઓ અમદાવાદ.
લોકસભાની ચૂંટણીને લઈને તમામ પક્ષો અને ઉમેદવારો નવા નવા વાયદાઓ કરી રહ્યાં છે. આ વાયદાઓ સોશિયલ મીડિયામાં પણ ચર્ચાનો વિષય બન્યો છે. ત્યારે અમદાવાદનાં પૂર્વ અને પશ્ચિમ લોકસભાની બેઠકનાં ઉમેદવારોનાં મતે અમદાવાદ કેવું છે અને તેમનાં મત વિસ્તારમાં તેઓ કેવો બદલાવ લાવવા માગી રહ્યાં છે અને તેઓ કેવું અમદાવાદ બનાવવા ઈચ્છે છે. આ જાણવા અમે લોકસભાની પશ્ચિમ બેઠકનાં ભાજપ અને કોગ્રેસનાં બન્ને ઉમેદવારોનાં મત જાણ્યાં. બીજેપીનાં ઉમેદવાર કિરીટસિંહ સોલંકી અમદાવાદને ઝૂંપડપટ્ટી મુક્ત કરવા ઈચ્છી રહ્યાં છે. જ્યારે કોંગ્રેસનાં ઉમેદવાર પ્રાથમિક જરૂરીયાત અને રોજિંદા જીવનની મુશ્કેલીઓથી પ્રજાજનોને મુક્ત કરીને સ્વચ્છ અમદાવાદની ઈચ્છા વ્યકત કરી રહ્યાં છે.
અમદાવાદ પૂર્વ બેઠકની વાત કરીએ તો 2014માં સાસંદ તરીકે અભિનેતા પરેશ રાવલ હતાં. પરંતુ પોતાનાં મત વિસ્તારમાં તેઓની હાજરી નહીં હોવાંથી સ્થાનિક લોકોમાં અસંતોષ હતો. આ સાથે બીજેપીનાં કાર્યકરો પણ નારાજ હતાં. ત્યારે આ વખતે બીજેપીએ અમરાઈવાડી વિધાનસભાનાં ધારાસભ્ય હસમુખ પટેલને ટિકિટ આપી છે. જ્યારે કોંગ્રેસ તરફથી પાટીદાર નેતા ગીતા પટેલે ઉમેદવારી નોંધાવી છે. બંને પાટીદાર નેતાઓ વચ્ચે કાંટાની ટકકર તો છે પરંતુ તેઓનાં મતે વિજય બાદ તેઓ કેવું અમદાવાદ ઈચ્છી રહ્યાં છે તે જાણવાનો પ્રયાસ કર્યો. ત્યારે ગીતાબેન ખોટાં વાયદા આપવા નથી માંગતા. તેઓ વાયદાઓ પૂરા થાય તેવું કામ કરવા માંગે છે. જયારે હસમુખ પટેલનાં મતે લાભદાયી યોજનાઓ પ્રજાજનો સુધી પહોંચે તેવું અમદાવાદ બનાવવાની ઈચ્છા વ્યકત કરી રહ્યાં છે.
મેગાસિટીનો દરજ્જો પામવાની ખેવના ધરાવતાં આ શહેરમાં રોડ રસ્તા અને પાણીની સમસ્યા સાથ છોડતી નથી. ત્યારે આ પ્રાથમિક સમસ્યાનું નિરાકરણ સાંસદ બન્યાં પછી થશે? શું સાંસદ બન્યાં બાદ મ્યુનિસિપલ કોર્પોરેશન પર દબાણ ઊભું કરાશે? શું આરોગ્યને લઈને લોકોની સમસ્યાનો ઉકેલ આવશે? કે આ વખતે પણ આ બધાં વચનો માત્ર વાયદાનો વેપાર બનીને સામી ચૂંટણી સુધી રાહ જોવડાવશે. એ તો આવનારો સમય જ બતાવશે.